Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Инвентивната Дијана денеска споделува рецепт за едно гастрономско уживање – ролнички од тиквичка со рикота.

„Прекрасна идеја за лесен ручек или мезе. Полнети со фил од рикота, моцарела, пармезан, потпечени врз домашен маринара сос. Пробајте ги, сигурна сум дека ќе ви се допаднат“, порачува Дијана.

Состојки:

– 2, 3 тиквички со средна големина

За маринара сосот:

– 1 помала главица кромид
– 2 чешниња лук
– 2 лажици маслиново масло
– 1 конзерва домати пелати
– 1 лажица свеж босилек (или 1 мало лажиче сув. Ако немате босилек, може да ставите оригано)
– сол
– бибер

За филот:

– 500 грaма рикота
– 100 грама моцарела
– 50 грама пармезан (рендан)
– 2 јајца
– босилек сечкан или магдонос, по желба

Подготовка:

Исечете ги тиквичките на тенки ленти по должина. Може да употребите нож за лупење зеленчук. Лентите тиквичка печете ги кратко на грил тава со малку маслиново масло. Ако се тенко исечени тиквичките може да ги полните и директно. Јас ги испеков на тавче бидејќи така сепак се помеки, испарува дел од течноста од тиквичките, а и повкусни се кога се малку потпечени.

За сосот:

Може да употребите и готов маринара сос или друг сос од домати кој вам ви е омилен.
Ако го подготвувате самите, исечкајте ја ситно главицата кромид и лукот. Испржете ги на маслиновото масло и додајте ги доматите. Зачинете со сол, бибер, босилек или оригано. Крчкајте го сосот на тивко додека се згусне околу 20 минути. Сосот треба да биде погуст бидејќи тиквичките ќе пуштат течност додека се печат.

За филот:

Во подлабок сад измешајте ја рикотата, ренданата моцарела и пармезанот. Додајте ги јајцата, босилекот или магдоносот. Измешајте ги убаво состојките
Загрејте ја рерната на 200 степени Целзиусови.
На дното на тавчето во кое ќе печете ставете две третини од сосот. На секоја лента тиквичка нанесете од филот со лажиче по цела должина и завиткајте во ролничка. Наредете ги сите ролнички. Врз секоја ролничка ставете по малку од останатиот сос и одозгора ставете рендан кашкавал или рендана моцарела.
Печете околу 20 минути покриено со алуминиумска фолија. Отстранете ја фолијата и печете уште 5-10 минути додека заруменат малку одозгора. Уживајте!