Кошаркарскиот клуб на Пелистер во викендот во кој се игра последното коло од првиот дел од сезоната реагираше со соопштение.

Од Пелистер забележуваат на федерацијата што одредени клубови не ги подмириле своите долгови.

Во пресрет на најавените промени во КФСМ во наредниот период, актуелното раководство во заминување уште еднаш покажува селективност во работата, што впрочем е и една од главните причини за незадоволство на мнозинството на клубови од луѓето кои во изминатиот период раководеа со куќата на кошарката.

Како клуб кој три години по ред играше финале во плејофот, максимално сме разочарани од игнорантскиот однос на луѓето од КФСМ кои не најдоа за сходно да одговорат на нашето барање, кое е особено важно ако се знае дека веќе од следната седмица ќе почнат плејоф битките, во кои логично е сите да влезат со ист третман од федерацијата која треба да се грижи за фер натпреварување, што за жал не е случај во Македонија.

Имено, КК Пелистер уште на состанокот на Здружението на прволигаши одржан уште пред завршниот турнир од Купот на Македонија, беше донесена конечна одлука – даден рок од седум дена за сите клубови целосно да ги подмират долговите кон федерацијата, за кои самото раководство уште во месец септември 2024 се пожали дека ја надминува границата од 200.000 евра (сума што во период на зачестени казни кон клубовите е можно да биде и дополнително зголемена).

Во меѓувреме беше одигран завршниот турнир од Купот на Македонија, како и неколку прволигашки рунди, па како клуб што отсекогаш бил со чисти сметки, сметаме дека е логично да се постави прашањето – дали „правилата за игра“ важат подеднакво за сите или некој (не)намерно го прави ова првенство нерегуларно.

Ставот на КК Пелистер е јасен – досега беше дозволувано индиректно „кредитирање“, па клубовите наместо да ги плаќаат големите долгови кон федерацијата, решаваа тие пари да ги насочат кон носење на нови засилувања, со што директно се влијаеше врз резултатите на одредени екипи во важен дел од сезоната.

За сериозниот проблем предупредивме повторно пред две седмици, со писмо со кое баравме ние како клуб, но и целокупната јавност да биде известена за состојбата околу (не)плаќањето на одредени клубови кон федерацијата.