Напредната технологија навлегува во сите области на животот, а влезот на Вештачката интелигенција во модниот дизајн го разгледуваме преку предизвикот во кој се впушти модната дизајнерка Искра Џокиќ Кецап.

Почетокот на 21 век донесе пофреквентна употреба на терминот вештачка интелигенција. Ако претходно тој термин се употребуваше во научните кругови или во СФ-романите и филмските дела, со напредокот на технологијата неговата примена станува достапна во многу области на секојдневниот живот на луѓето. Иако на многумина, сѐ уште, им звучи апстрактно дека „машина би можела да размислува“, сепак, веќе постојат компјутерски програми што генерираат мноштво решенија на зададени загатки од човекот.

Искра Џокиќ Кецап е моден дизајнер, CLO 3D дизајнер и уметник со меѓународно препознаен талент, која, исто така, е првата кај нас што изработува модни дизајни генерирани со вештачка интелигенција (AI – Artificial Intelligence). Таа е алумна на Универзитетот за уметности во Токио и на „Академија Италијана“ (Accademia Italiana), со богато искуство во модната индустрија и во костимографијата.

Какво влијание има Вештачката интелигенција (ВИ) во модниот дизајн?

– Вештачката интелигенција или ВИ (AI) отвора нови можности и концепти во поглед на модните дизајни, кои можеби дизајнерот во моментот не ги гледа. Но, дизајнерот е тој што ја дава оригиналната идеја, односно тоа не секогаш значи дека тие варијации знаат да бидат подобри од оригиналната идеја.

Кои се практичните придобивки од појавата на ВИ?

– Со помош на ВИ може мошне брзо, со нарација пренесена до неа, да се преведат идеите на модниот дизајнер во визуелни решенија или дигитални дизајни, за кои, според мене, јасната визија и креативноста на дизајнерот се клучни.

Какви алатки, програми и компјутерска конфигурација се потребни за примена на ВИ?

– ВИ претставува платформа за која не се потребни некои посебни софтверски алатки, ниту, пак, јаки конфигурации на персонален компјутер. Она што ограничува во поглед на вештачката интелигенција е само фантазијата на дизајнерот.

На кои конкретни проекти имаш работено со ВИ и по која метода?

– Треба да се земе предвид дека времето на ВИ допрва доаѓа и зема замав сѐ повеќе во светот. Учествував на интернационални конкурси што беа актуелни, како, на пример, натпревар што вклучуваше изработка на модни дизајни со помош на ВИ на тема „Атлантис“, или „Ода на климатските промени и одржливоста“. Исто така, правам ВИ креации во движење, каде што со комбинирање различни софтверски алатки се постигнува интересен резултат. Но, ова не е крајот, ова е само почетокот, очекувам во иднина да има многу проекти.

Што значи појавата на ВИ за иднината на модниот дизајн?

– Се поставува етичкото прашање дали ВИ може да го замени дизајнерот, но сепак, одговорот на тоа прашање може да го даде времето. За мене, душата на дизајнот секогаш ќе ја претставува дизајнерот, неговата фантазија, како и светот кој таа го создава.

(Разговорот е објавен во „Културен печат“ број 166, во печатеното издание на весникот „Слободен печат“ на 11-12 февруари 2023)