Европското првенство во ракомет е се поблиску, а женската репрезентација за првпат ќе настапи на еден голем турнир после пауза од цели 14 години. Немавме многу среќа во ждрепката, па добивме група со Холандија, Франција и Романија во која сме аутсајдери. Сепак, селекторот Љубомир Савевски и девојките сигурно нема да излезат со „бело знаме“.

Во краток разговор за „Слободен Печат“ Савевски искажа задоволство од моменталната форма на ракометарките. На неколку дена пред Европското првенство се тренира со посилен интезитет.

„Се работи,  попуштивме малку со интезитетот, па сега пред првенството мораме да работиме малку посилно, вчера имавме два тренинзи, исто така и денес, па потоа ќе одиме со два дена по еден. Можам да кажам дека сум задоволен од тоа како работат ракометарките и нивната форма“.

Групата како што споменавме е и тоа како тешка, па затоа најважно за нас е да одиграме добро и да покажеме карактер. Се друго би било само „плус“ и голем успех за нас, иако поминување во втората фаза не се поставува како императив.

„Ги гледавме последните натпревари на Франција, Холандија и Романија, едноставно не може да каже човек која репрезентација би била таа против која би ја барале шансата. Среќни ќе бидеме ако победиме една. Голем успех за нас ќе биде ако би се пласирале во втората фаза, но во ваква конкуренција не е императив, ниту од федерацијата, ниту од мене како тренер. Најважно е да се одигра добро и да покажеме карактер“.

При објавувањето на списокот изненадување за јавноста беше што на него ја немаше Марија Штериова.

„Штериова претходно имаше повреда, потоа тука со Норвешка првата ја одигра, па повторно се повреди. Требаше да мирува, но одигра некој натпревар и не се чувствуваше сигурно да не се обнови повредата. Нејзина желба беше да не ризикува“.

За крај Савевски истакна дека сите ракометарки што се повикани во составот немаат проблеми со повреди и секако сите сакаме така и да остане за натпреварите кои следуваат. Натпреварите од групата Ц, македонската селекција ќе ги одигра против репрезентациите на Франција (05.11.2022), Холандија (07.11.2022) и Романија (09.11.2022). Сите натпревари ги играме од 18:00 часот.

РАКОМЕТАРКИТЕ СО КОИ ЌЕ НАСТАПИМЕ