Македонскиот музичар Благој Ламњов, кој живее и работи во Шведска, на 1 ноември ќе го објави својот втор албум со наслов „Носталгична љубов 2“, што го сними во Малме, а преку музичките платформи ќе биде достапен за слушатели од целиот свет.

Новиот албум на кларинетистот Благој Ламњов е снимен во „Gula Studion“ во Малме, Шведска. Во процесот на снимање, миксање и мастерирање работеше Давид Карлсон, додека сите композиции се напишани, продуцирани и отсвирени од самиот автор.

Со својот кларинет Благој Ламњов прави спој на македонската етномузика со западниот стил на свирење, а во неговата музика се присутни и влијанија од светската музичка ризница.

На 1 ноември излегува твојот втор албум со наслов „Носталгична љубов 2“ (Nostalgic Love 2). Поминаа речиси пет години од првиот албум. Низ каков процес беше создаден новиот албум?

– Искрено, во текот на креирањето на „Nostalgic Love 2“ немав никаков план, туку оставив сѐ да доаѓа природно. Некако не ми се влегуваше во таа тажна и емотивна просторија каде му доаѓа инспирацијата на секој уметник. Затоа бев доста бавен.

А оној другиот дел (да го наречам делумно „работнички“ дел), вежбање, аранжирање и така натаму, исто така ми одеше бавно затоа што минативе три години кај мене владее огромна желба за патување низ Европа и чувство на слобода и безгрижност.

Но, ете ги завршив темите, ставив подлога од други инструменти, вежбав на сите инструменти (особено последните осум месеци поактивно) и влегов во професионално студио за да успеам да го снимам целиот албум во два долги дена, со работа од 10 до 23 часот навечер.

Зошто одлучи да го задржиш истиот наслов „Носталгична љубов“?

– Кога го издадов првиот албум, се почувствував недоречено. Тоа беше голема школа за мене, така што веднаш одлучив дека ќе си дадам уште една шанса за да се доискажам. Уште тогаш одлучив дека ќе го носи истото име и дека музички ќе оди во истиот правец како и првиот.

Мислам дека тука се пронаоѓаат многу музички уметници и продуценти кои творат, пред сѐ, искрено за себе и за најдрагите, за искрено да искажат што чувствуваат. Сметам дека штом човек издаде еден искрен албум, никогаш нема да му е доволно. После секој албум тој продолжува да се доискажува, иако можеби никогаш нема да му е доволно. Навистина чудно чувство.

Сите теми на албумот сам ги напиша и ги продуцираше. Исто, сите инструменти, вклучувајќи го и кларинетот, сам ги свириш. Од каде извира мотивацијата за креација на албумот?

– Прво би сакал да спомнам дека во две од темите користам народни македонски мелодии, а во една користам мелодија од босанска севдалинка. Останатите осум се целосно мои, но сигурно се појавуваат фрагменти што веќе постојат во друга музика во светот. Тоа е исто кај сите уметници, писатели, поети.

Околу креативниот процес, кај мене често се јавува една огромна потреба преку мелодија да избие тоа што го чувствувам во себе. Таа потреба е голем извор на музички идеи кои, пред сѐ, ми се мене лично потребни да ги слушнам. Потоа доаѓа на ред умешноста и употребата на македонскиот фолклор, како и западната класична традиција, фразирање, и класичниот тон на кларинетот. Таа комбинација од стилови ја прави таа едноставна мелодија многу сложена за свирење, преполна со микро динамики и најситни детали што е невозможно да се запишат на ноти. Ете, тој краен резултат е нешто што едвај чекам да го слушнам, а потоа и да ја видам емоционалната реакција кај другите.

Какви приказни обработуваат темите и како ги избираше насловите на истите?

– Секоја од темите крие мои мечтаења кон некое минато случување, спомен, или, пак, серија од случувања во некој пократок или подолг период. Дури и морските бранови кои јас лично го снимав за темите број 5 и 6, ги снимав на Јадранско Море во Истра, Хрватска, на место каде што имам важни спомени (и тоа две недели одев сѐ додека не ми се бендиса ветерот и звукот на брановите).

Некогаш една тема почнала мечтаејќи кон еден период, а завршила при мечтаење кон друг период и други луѓе. Токму тие спомени што ми поминуваат низ мислите додека импровизирам со инструментот ги креираат тие теми и ми помагаат да ги интерпретирам така длабоко и сложено.

Насловите на речиси сите теми ги избрав од кога веќе темата била готова. На што најмногу ме враќа таа тема кога ја слушам, таков наслов добива, а со тоа сите мои мисли и мечтаења кои помогнале да се направи таа тема се собрани во тој наслов. И сѐ е направено за јас самиот да се чувствувам убаво и исполнето кога ги слушам темите.

Повеќе музички влијанија има во темите на албумот, но клучен е спојот на македонската етно музика со западниот сензибилитет на свирење на кларинет. Каква мисија, во суштина, имаат твоите албуми?

– По првиот албум се создаде еден круг на слушатели кои никогаш претходно не биле заинтересирани за инструментот кларинет, ниту, пак, за народната македонска музика. Според нивните коментари, сум им открил една друга слика за кларинетот и за нашиот фолклор. Истовремено, ми откриле дека им буди невообичаено емотивни чувства и, така речено, ги омекнува. А сето тоа има моќ да го промени човекот и да ја манифестира добрината кај него.

Мислам дека тоа е една убава мисија и придонес во општеството. А патем, светот добива една поблиска и поразбирлива слика за Македонија. Ова е како еден мост кој нѐ поврзува со Западот. А сепак, сето тоа јас го правам без намера, туку за себе.

Какви се плановите за промоција на новиот албум, покрај објавата на музичките платформи?

– Следуваат три мои концерти во Шведска, каде што ќе се свири музика од новиот, но и од првиот албум. Првиот концерт од оваа серија ќе се случи на 25 ноември во Концертната куќа на Гетеборг (во помалата сала која собира 400 луѓе во публиката).

На 1 ноември албумот ќе биде објавен на сите музички платформи (Спотифај, Бендкемп, Амазон, Епл мјузик, Јутјуб итн.) под уметничкото име „Blago J“. Сакам во 2025 година да имам неколку концерти некаде низ Европа, но тоа ќе зависи од одзивот на публиката на првите три концерти.

(Разговорот е објавен во „Културен печат“ број 253, во печатеното издание на весникот „Слободен печат“ на 26-27.10.2024)