Јон Ајдини или попознат под уметничкото име Yon Idy е талентирано момче од Скопје и зад себе веќе има неколку песни, кои, покрај на локалните се пуштаат и слушаат на многу радио бранови ширум светот.

Свој, шармантен, талентиран – ова се првите импресии со кои ги остави на публиката откако се претстави со својата песна „Dreams“ со која сака да ја претставува нашата земја оваа година на Евровизија.

Ние си седнавме со Јон и го замоливме да ни раскаже за искуството да се биде дел од потесниот круг за избор на песна за Евровизија, какви се неговите очекувања и досегашни импресии.

„На повикот учествуваа 47 музичари а во потесниот круг влеговме само ние шесторица. Едвај чекав да ги слушнам другите 5 песни и од оваа перспектива можам само да претпоставам дека МРТВ успешно издвоила 6 песни кои се разликуваат од многу аспекти. А тоа е добро, бидејќи така се задоволени различните вкусови на публиката. Ако бидам избран за претставник на Евровозија, пред се, очекувам да научам многу. Свесен сум дека сето ова е голема одговорност, но и шанса да ме запознае Европската публика, како музичар, како автор. Самото учество е одлична промоција, како за претставникот, така и за земјата од која доаѓа“, откри Јон за „Слободен Печат“.

Како што ни открива, веќе има визија за својот евровизиски настап и се надева дека ќе најде совршен баланс помеѓу креативноста и професионалниот тим со кој би работел.

„За мојот настап размислувам многу. Имам неколку идеи. Верувам дека би работел со професионален тим кој многу поуспешно би го осмислил настапот, а би ги зеле и моите идеи предвид. Песната има мелодија и ритам кои може да бидат доловени на специфичен начин што ми е во глава, но не би го откривал сега“, вели Ајдини.

Јон се потпишува како автор на песната „Dreams“, а околу аранжманот му помогнал Ангел Ќосев. Па, која е пораката што сака да ја пренесе на европската публика со својата песна?

„Dreams“ е песна која ја напишав инспириран од лични случувања и доживувања. Сонот во рефренот е всушност прекрасен сон во кој нештата со мојата поранешна љубов се совршени и ние сме среќни, но во строфите се враќам во реалноста каде се присеќам на сите проблеми кои реално постоеа. Љубовта може да биде совршена како во соништата, но многу мора да работиме на тоа“, вели Јон.

Гласањето за евровизиската песна е во тек, а вашиот глас можете да го дадете на следниов линк.

Нека победи најдобриот!