Битолската група „Код 369“ оствари извонреден успех на музички план во текот на 2022 година, а потпишаниот договор со „Кроација рекордс“ и објавата на новиот албум им ги отвори портите кон целиот регион.

Универзалните човекови вредности, љубовта како движечка сила и моќта на индивидуата како двигател кон своето најдобро јас се суштинските карактеристики на музиката на битолскиот бенд „Код 369“.

Во состав Ирена Димовска (вокал), Даниел Митревски (гитара, придружни вокали), Иле Лулевски (тапани, придружни вокали) и Коста Стеваноски (бас гитара, клавијатури) бендот во текот на 2022 година успеа да се етаблира и на регионално ниво. Најуспешната година на групата ја сумираме низ разговор со вокалната солистка Ирена Димовска-Митревска.

Во текот на целата 2022 година имаше објави за групата „Код 369“. Какви се импресиите? Можеме ли да кажеме дека тоа беше досега најуспешната година за групата?

– Со оглед на тоа што групата е оформена во 2020 година, во време на пандемијата и како бренд доживеа промовирање токму во 2022, дефинитивно тоа е најуспешната година за „Код 369“. Имајќи предвид дека сите ние сме искусни и веќе докажани артисти, многу полесно беше за нас и за „Баги комуникации“ да ја подигаме приказната на „Код 369“, за разлика од времето кога ги правевме нашите музички почетоци. Импресиите се одлични. Прекрасни соработки и фестивали во годината што измина, договор со најголемата издавачка куќа во регионот „Кроација рекордс“, но и со „Баба продукција“, а она што нас најмногу нѐ храни како уметници се прекрасните осврти и рецензии на музичките новинари и критичари за нашите музички дела и за начинот на музицирање.

Што значеше излегувањето на албумот „Стадиуми на љубовта“ (Stages of Love) за дискографската куќа „Кроација рекордс“, и во практична и во креативна смисла?

– „Стадиуми на љубовта“ е албум исполнет од нашите лични емоции и нашите творечки форми. Тоа што „Кроација рекордс“ го препозна кај нас како творечки капацитет, но и како комплетна продукција произлезена од нашето студио „Ателје“, која им беше понудена и прифатена во форма на завршен производ, е само поттик за понатамошна посветена работа на нашата музика, која ги изразува турбуленциите на емоциите. Текстовите ја величаат љубовта. Некои од композициите од овој албум се сага и инспирација за секој уметник што сака слободно да ги создава своите дела и да ја сподели својата креативна моќ за доброто на сите. Во време на сериозна закана за општеството, и за човештвото воопшто, сакаме да нагласиме дека се чини како уметноста да го губи своето значење и, ако не е излишна, тогаш барем е занемарена. Ако постои нешто што навистина ги поврзува сите луѓе, тоа е уметноста, која треба да е величана, обожувана и споделувана, исто како и љубовта. Со нашите погоре споменати соработници се стремиме што повеќе да ја шириме и удвојуваме таа љубов.

Објавата на албумот ви донесе публицитет во јавноста, но и низа покани за концерти во регионот. Кои се најзначајните концерти од минатата година?

– Ќе набројам само неколку: Скопски градски фестивал, „Бит-фест“, „Славонија фест ЦМЦ 200“, кои беа прекрасни доживувања за нас како изведувачи и, се разбира, немаше да остават толку убави впечатоци без неизбежниот повратен момент од многубројната публика. Исто така, би сакала да ги спомнам и самостојниот концерт во кино „Фросина“, телевизискиот концерт во студијата на „Кроација рекордс“ во Загреб и промотивниот концерт за нашиот албум за Македонија во „Аудиокултура“, кои се, исто така, наши драги настапи во изминатата година. Годината ја заокруживме со концерт пред битолската публика на „Зимска приказна“ пред Офицерскиот дом.

Вашиот музички израз жанровски е дефиниран како уникатен спој помеѓу алтернативниот рок и поп-рок музиката со моменти на фанк, џез и класични инструментализации. Која е суштинската разлика помеѓу претходната формација со „Памперс“ и новата со „Код 369“?

– Главно тоа е растот и созревањето што ние како индивидуи ги доживуваме на професионален, но и на емотивен план. Тоа се часовите поминати во студио, но и тие поминати пред публиката, како и музичките влијанија што ги провоцираат неизбежните варијации што се слушаат во нашата музика. Како што и другпат сме раскажале, „Код 369“ е продолжение на музичката дејност на „Памперс“, и во тој поглед е еден нераскинлив континуитет, кој сега има едно друго име поради одредени суштински промени.

Во групата истовремено си вокалистка и текстописец. Главните мотиви во песните се поврзани со љубовта, но какви ситуации те инспирираат за пишување на текстовите?

– За себе верувам дека сум битие што функционира на емоција и се храни со емоција, но со оглед на тоа што не живеам изолирано во некој измислен свет, јас морам да го пронајдам тој свет и да се изолирам во него. Тој секогаш е некаде помеѓу стварноста и сказната, сонот и јавето. Мојот свет, кој неизбежно има влијанија од сето она што ме опкружува, е потсвесно обременет со реалноста. Покрај љубовта, јас секогаш ставам акцент и на социјалните моменти, слободата на човекот да живее и да твори и по свое, а не само така како што диктира општеството или економијата. Така што, моите текстови најчесто се љубовни или социјални.

Албумот е проследен со два сингла. Колку во суштина на македонската музичка сцена недостига систематски пристап во промоцијата на музиката?

– Првиот сингл што е снимен на македонски јазик беше „Остани до крај“, кој доби одлична презентација на радиостаниците и веднаш беше прифатен и засакан од слушателите. Првиот сингл на хрватски јазик е со наслов „Права љубав“. Зборува за безвременоста и за бесконечноста на искрените чувства и на несебичноста. Наредниот сингл се вика „Мјесечина“ кој, како и целата наша музика, е тема што произлегува од нашите битија. Тоа е вториот сингл на хрватски јазик, кој зборува за искрениот порив на секое човечко суштество да ги постигне и надмине личните и општествените очекувања со инспирација и трудољубивост.

За македонската публика е подготвен уште еден сингл на македонски јазик, кој до пролетта ќе биде објавен. Нашето начело на работа во однос на промовирање синглови од албумите е ваков многу години наназад, уште од времето кога нашите синглови беа промовирани во форматите „Ем-ти-ви Премиера“ и на топ-листите на регионалниот Ем-ти-ви канал. Ова е прифатено и од музичките новинари и уредници со кои соработуваме во Македонија и на тој начин продолжуваме да ги промовираме сите синглови од нашите албуми.

(Разговорот е објавен во „Културен печат“ број 162, во печатеното издание на весникот „Слободен печат“ на 14-15 јануари 2023)