Една од најубавите работи кои можете да ги направите за себе е да стекнете здрави навики во секојдневието, како што е редовната физичка активност.

Секој почеток е тежок, но откако ќе го надминете недостигот на мотивација и ќе се соочите со непознатото – придобивките се многубројни.

На оваа тема поразговаравме со Димитар Бошкоски, 31-годишен фитнес тренер од СЦ „Јане Сандански“ во Скопје, кој ги сподели своите совети за сите почетници во овој спорт.

Димитар, како започна твојата приказна со фитнесот? Колку време се занимаваш со овој спорт и што е она што намногу те исполнува во работата како професионален тренер?

– Јас почнав со фитнес во тинејџерските денови, првпат влегов во фитнес-сала на 15 години. Бев фасциниран од разните видеа и фотографии на интернет, од луѓе кои прават драстични промени со своето тело, па се одлучив и јас да пробам на себе. Јас сум повеќе од 12 години во овој спорт, односно начин на живот. На почетокот беше хоби, а потоа се одлучив да пробам и малку попрофесионално и да се пријавам на фитнес-натпревари.

Како тренер, најмногу ме мотивира тоа што имаме заеднички предизвик со клиентите, дека сѐ е возможно доколку се направат некои промени во секојдневниот живот. Тренингот е она главното што ги носи промените на вашето тело, а јас сум тука со нив тоа да биде во најправилна форма.

Физичката активност е многу важна за добро здравје, но и за убав изглед. Имајќи предвид дека пролетта е период кога многумина се мотивирани да почнат со вежбање, кои се најважните совети за почетниците во овој спорт?

– Најважниот совет којшто можам да го дадам е да не почнуваат со ригорозни диети и тешки тренинзи, затоа што тој начин на живот бргу ќе им здодее. Треба да се почне чекор по чекор. Да се пие повеќе вода, да се исфрлат сите лоши шеќери од секојдневната употреба и барем неколкупати во неделата да се испешачи по еден час. Тежинскиот тренинг е тој што ќе им помогне за затегнување на телото и изградба на мускул. Три тренинзи во фитнес-сала се сосема доволни на почеток за добри промени.

Справите во фитнес-салата може да бидат застрашувачки за оние кои досега немале искуство. Како да се надмине стравот од вежбање во една ваква средина?

– На почеток, и самиот влез во ново место може да биде застрашувачки, но тие стравови бргу поминуваат. Секој што е заинтересиран може да дојде на пробен тренинг со професионално лице, кое ќе им ги објасни справите и нивната функција. Така најлесно ќе сфатат дека нема потреба од страв.

Кои се најчестите грешки што ги прават почетниците и како да ги избегнат при тренирањето?

– Речиси сите почетници учат од инстаграм-видеа и веднаш пробуваат со комплицирани вежби, избегнувајќи ги основните вежби. Прво мора да се направи подлога за тие вежби. Основните вежби ќе направат темел за понатамошниот процес во изградбата на здрави мускули и ќе направат поголема заштита на телото од повреди.

Колку е важна правилната исхрана за успехот на фитнес-програмата?

– Исхраната е и најважниот момент во целиот овој процес. Нема резултати без исхрана со тренинг. Исхраната е таа од која зависи телото, енергијата, регенерацијата, изградбата на мускули. Барем денес е доста лесно да се придржуваш на добра исхрана, со оглед на сите здрави и протеински производи на нашиот пазар.

Како да се постават реални и достижни цели? И како да се одржи мотивацијата и континуитетот при тренирањето, дури и кога имаме впечаток дека не го постигнуваме она што сме го зацртале?

– Најголем проблем е што почетниците сакаат тело за три месеци, но градењето на добро и здраво тело бара повеќе од тоа, бара континуитет. Мора да сфатат дека тело за на плажа не се прави за толку краток период. Секако, неколку месеци се доволни да се види убава промена, но треба повеќе од тоа да се стекне здрав и квалитетен мускул. Телото по некое време доаѓа до стагнација, за тоа тука се и додатоците во исхраната, суплементите, кои помагаат во целиот овој процес, за полесни резултати, поголема енергија и подобра регенерација за која храната во некои моменти и не е доволна.

Како да се избегнат повреди и да се одржи безбедноста при тренирањето?

– Ова е спорт каде што знае да дојде до повреда, дури и кај професионалните лица. Добро загревање на телото е првиот чекор, лесни тежини додека не се загрее мускулната партија втор чекор и тегнење по тренинг како трет чекор. Исто така, би било добро ако ве следи фитнес-тренер во целиот процес да ви укаже на грешките при тренирањето, да ви помогне со тежините, за совети во вежбите и нивно полесно правење.