Маж и жена – сопружници од делчевското село Град доживеале вистинска драма во овоштарникот во кој работеле – ги нападнал бикот на соседот, кој разбеснет ги бркал низ овоштарникот, па морале да се качуваат на дрво за да спасат жива глава.

Гневното животно дури и се обидувало да ги тресе дрвјата на кои се качиле сопружниците, а тој го оштетил и нивното возило. Преплашените сопружници се јавиле кај пријател, а дошла и полицијата, која, пак, го повикала сопственикот на бикот и тој успеал да го смири, пишува порталот „ММС“.

Штипската полиција информира дека во понеделникот во 15:20 часот во СВР Штип било пријавено дека во нива на место викано „Низамски ниви“ кај делчевското село Град, С.С. и неговата сопруга Ј.С. биле нападнати од бик, сопственост на соселанецот М.С., при што биле направени оштетувања на овоштарникот и на нивното возило.

-Во Полициската станица Делчево на службен разговор бил повикан сопственикот М.С., а увид на местото извршила увидна екипа на ОВР Делчево. Се работи на комплетирање на случајот, по што против М.С. ќе биде поднесена соодветна пријава, соопшти полицијата.