Поранешниот генерален секретар на Владата, Драги Рашковски, реагираше откако дел од медиумите објавија дека бил задржан на границата со Грција при обид да изнесе 20.000 евра од земјава.

„Во врска со некои написи на медиумите дека сум задржан на граница со Грција, тие се апсолутно невистина. Станува збор за легално пријавени средства на царинскиот службеник, со извод од банка, кои се внесуваат во државата, а не се изнесуваат. Ве молам како медиуми да не ширите невистини“, напиша Рашковски на „Фејсбук“.

Некои медиуми денес објавија дека Рашковски бил фатен со 20.000 евра кеш на граничниот премин, за кои немал покритие и не биле пријавени, како и дека бил задржан, а парите конфискувани. Тој тврди дека станува збор за неточни информации и инсистира дека средствата биле целосно законски пријавени.