Резултатите од истражувањата за тоа дали кучињата ги препознаваат човечките емоции и нудат утеха на своите сопственици во моменти на тага или неволја покажуваат дека овие миленичиња навистина се емпатични. Ако сте среќни или тажни, кучињата тоа го забележуваат и го „читаат“ подобро од повеќето луѓе.

Но, научниците се запрашале дали постојат раси кои се повешти од другите во покажувањето сочувство. Според истражувањата, апсолутен шампион во „читањето“ на емоциите на сопственикот и пружањето утеха или радост е златниот ретривер, пишува „Кјутнес“.

Познат по својата непоколеблива лојалност и пријателски темперамент, златниот ретривер има уникатна способност да се прилагоди на чувствата на својот сопственик. Оваа извонредна особина не е случајна: златните ретривери се селективно одгледувани со векови, со посебен фокус на развивање на нивната природна социјалност, која ги прави особено емпатични миленици.

Историски развој на златниот ретривер

Историски гледано, оваа раса станала популарна во Шкотска во 19. век, каде што им помагала на ловците во пронаоѓање птици. Оваа улога барала блиска соработка со луѓето, развивајќи особини како одзивност и внимание, кои им помагале на кучињата да формираат силна врска со сопствениците. Со текот на времето, овие карактеристики се развиле во извонредна емоционална интелигенција по која златните ретривери се познати денес.

Нежната и лојална природа на златниот ретривер е длабоко вкоренета во нивната историја, генетски предиспозиции и она што се нарекува инстинктивна интелигенција – особини кои биле поттикнувани при одгледувањето. Ова е една од трите главни видови интелигенција кај кучињата, покрај адаптивната интелигенција и интелигенцијата за работа и послушност. Интуитивната способност за препознавање на емоционалните промени е јасно видлива во начинот на кој златните ретривери реагираат на своите човечки семејства. Тие често ги следат своите сопственици од соба во соба, ги поздравуваат ентузијастички дури и по кратки оддалечувања и нудат физичка блискост во моменти на неволја.

Идеални терапевтски кучиња

Сите овие карактеристики го прават златниот ретривер идеална раса за терапевтска и помошна работа. Истражувањата покажале дека терапевтските кучиња, вклучувајќи ги и златните ретривери, позитивно влијаат на здравјето на луѓето преку намалување на стресот и подобрување на расположението.

Една студија, објавена во списанието „Анималс“, открила дека интеракциите со терапевтски кучиња можат да го намалат високиот крвен притисок и да влијаат на нивото на стрес-хормоните, што придонесува за општата емоционална благосостојба на пациентите.