Ракометниот клуб Бутел Скопје денеска запиша победа во првиот натпревар од првото коло во ЕХФ Европскиот Куп на гости кај Дуделанж со 31:27 и се наоѓа на чекор до пласман во втората рунда.

После првото полувреме играчите предводени од тренерот Горан Кузманоски имаа предност од четири гола разлика (17:13).

Во текот на првото полувреме Бутел Скопје одржуваше и позитива од шест голови разлика (13:7, 14:8), а така беше и во финишот од вториот дел на мечот (30:24, 31:25).

Во победничките редови Филип Николов постигна девет гола, Тодор Узунчев даде седум, а Димитар Узунчев стрелаше пет пати.

Значаен придонес во триумфот на македонскиот претставник имаше и голманот Благојче Трајкоски кој одбрани 13 удари на домашните.

Реванш средбата меѓу Бутел Скопје и Дуделанж ќе се игра на 13 септември од 18.00 часот во СЦ „Јане Сандански“ – Скопје.