Има извршено мерење на радиоактивен фон во РЕК Битола и тој „не е многу поголем“ од природниот фон на зрачење, изјави денеска в.д. директорот на Дирекцијата за радијациона сигурност Зоран Бајовски на одбележувањето 20 години од формирањето на независниот национален регулаторен орган.

На новинарско прашање дали Дирекцијата има надлежност врз работењето на РЕК Битола, откако неодамна се издигна радиоактивен пепел од нејзиното работење, Бајовски рече „извршено е мерење во 2024 година и сега од страна на еден од техничките сервиси и констатирано е дека тој не е многу поголем од дозволениот природен фон на зрачење“.

– Македонија нема нуклеарна централа, ниту нуклеарно гориво, но не е имун на природниот фон на зрачење којшто го создава самата природа. За РЕК Битола, конкретно, не е многу поголем од дозволените граници. Извршено е мерење и во 2024 година и сега од страна на еден од техничките сервиси и констатирано е дека тој не е многу поголем од дозволениот природен фон на зрачење. Мислам дека беше помалку од 5.000 нанохири, но не ме држете за збор, да не шпекулираме со бројки, доколку сакате ќе ви ги доставиме тие во писмена форма, рече Бајовски.

Природниот фон на зрачење, вели, го има и во моментов, бидејќи, како што појасни, сите ние сме и сега изложени на јонизирачко зрачење кое што е во граници на нормала.

– Природниот фон го имаме и тука надвор, ние сме и сега изложени на јонизирачко зрачење и тоа е во граници на нормала кај што не е штетен за нашиот организам. Сите работници кои што се професионално изложени според закон во Република Македонија мора да носат лични дозиметри. Тие дозиметри се учитуваат на месечно ниво и извештаите ги добиваме ние како Дирекција. Дозволените граници се 0,9 микросиверт, рече Бајовски.

Основното јавно обвинителство Битола оформи предмет за одлагањето на пепелта во РЕК Битола, дали тоа се врши според прописите, согласно еколошката дозвола и дали се работи за тоскична пепел. Ова следеше по реакциите во јавноста и објавените фотографии и видеа на социјалните мрежи дека во Битола и околината се шири токсична прашина од РЕК Битола.