Во американската сојузна држава Калифорнија во понеделникот стапи на сила законот според кој големите синџири на ресторани за брза храна мора да им плаќаат на работниците најмалку 20 долари на час, јавуваат американските медиуми. Законот минатата година беше потпишан од страна на демократскиот гувернер Гевин Њусом, а сопствениците на ресторани се жалат дека ќе мора да отпуштат работници и да ги зголемат цените.

Федералната минимална плата во САД е 7,25 долари на час. Државите, исто така, можат да одредат повисоки минимални плати, а во Калифорнија таа е одредена на 16 долари на час. Исклучок се минималните плати за работниците во рестораните за брза храна како Мекдоналдс, Бургер Кинг и слично. Околу 500.000 луѓе, главно жени и малцинства, работат во ресторани за брза храна низ Калифорнија.

Просечната плата е 25.800 долари годишно, а во целата земја е 43.000 долари, пренесува AФП. „Поради зголемувањето, сите ќе мора да платиме повеќе“, изјави главниот финансиски директор на Чипотл Мексикан Грил, Џек Хартунг за Вол Стрит Журнал. Во Калифорнија, и покрај зголемувањето на минималната плата, од 2015 година се отворени нето 142.000 работни места во ресторани за брза храна, пренесува „СЕЕ.биз.еу“.