Пораз на македонскиот кошаркарски клуб Работнички на статот од квалификациите од ФИБА Еврокупот. Во воведниот натпревар од групата „А“, пред својата публика во СРЦ „Кале“ во Скопје, загуби од романскиот Рапид Букурешт со 57:87. По релативно израмнетото прво полувреме, нашиот претставник попушти во вториот дел, што гостите од Букурешт знаеја да го искористат и да стартуваат успешно во квалификациите.

Работнички само еднаш во текот на мечот беше во предност од 10:9 во текот на првата четвртина. Сепак, играчите на Рапид изгледаа доста посигурно на паркетот, а почетна нервоза имаше кај редовите на Работнички, барем во оние воведни шест минути во кои Романците водеа со 21:15.

Седум домашни кошаркари се запишаа во листата на стрелците во тој прв период, во кој на крајот, екипата од Букурешт ја задржа предноста, макар и минимална, (21:20). Доста израмнето беше и во вториот период, по тројката на Трајс, во 13 минута, Работнички стигна до нерешен резултат (26:26). Никако Работнички не доаѓаше да го „сврти“ повторно резултатот во своја корист. Три минути подоцна, Рапид имаше 35:31, иако играчите на Димитар Мираковски стигнаа до нов егал од 41:41, нивните противници на пауза водеа со 45:41.

Рапид го најави својот триумф во третата четвртина кога дојде до двоцифрена разлика од 66:55. Како одминуваа минутите, така домаќините како да ја губеа онаа потребна енергија со која и би се обиделе да се вратат назад во натпреварот.

А доказ за тоа се само двата постигнати поени во последната четвртина, истата Рапид Букурешт ја освои со 21:2. Трајс и Џелетовиќ кај Работнички беа најефикасни со по 15 поени.

Новиот дуел Работнички ќе го има денеска од 20.30 часот азербејџанскиот Сабах на нашиот тренер Боби Митев, кој излезе како победник на премиерниот меч против екипата од Гронинген од Холандија со резултат 75:72.