Центарската гордост, екипата на Работнички, ќе биде сериозно ослабена на стартот на новата сезона во Суперлигата, поради неочекуваната ситуација со странските играчи. Во првото коло, против Пелистер, тимот ќе настапи без четворицата странци кои беа ангажирани во летниот преоден рок, поради суспензија на ФИБА за регистрација на странски кошаркари.

Суспензијата е изречена поради шест пријави од поранешни кошаркари и функционери за неисплатени обврски, што го принуди најтрофејниот македонски клуб да настапи исклучиво со домашни сили во воведното дерби. Покрај проблемите со составот, ситуацијата влијаела и на терминот на натпреварот, па наместо традиционалниот понеделнички термин со директен пренос на МТВ, „центарци“ решија да играат в недела од 15 часот во салата „Кале“.

Првичната намера на клубот беше да се закаже подоцнежен термин за да се добие дополнително време за регистрација, но тоа не беше дозволено. Челниците на Работнички се надеваат дека до второто коло, во дуелот против градскиот ривал ТФТ, ќе биде надмината оваа административна пречка и дека странските играчи ќе можат да се вклучат во игра.

Преземено од: Спорт.ком.мк