Ученици од јавните средни училишта „Лазар Личеноски“, „Орце Николов“ и „Јосип Броз Тито“, како и студенти од Факултетот за ликовни уметности на Универзитетот „Кирил и Методиј“, на 11 и 12 мај во Скопје имаа уникатна можност да присуствуваат на работилници за вазното сликарство од петтиот век п.н.е. во Атина.

Работилниците беа организирани од Амбасадата на Грција во Скопје со поддршка на компанијата „Energy Delivery Solutions“ (EDS) и под надзор на грчкиот уметник, г-динот Танасис Кацарас.

Семинарите траеја три часа и опфатија: а) кратка презентација на грчкото вазно сликарство, б) настава за техниката на вазното сликарство и в) практична обука, каде што учениците и студентите имаа можност да го насликаат својот Лекитос.

Лекитос бил вид на сад во античка Атина, во кој се чувале парфеми. Други садови кои имале иста употреба во архајското и класичното време биле Алабастер и Арибал.

Илјадници Лекитос со црни или црвени фигрури на бела позадина се наоѓаат во музеите ширум светот и претставуваат некои од нивните најубави експонати, известија од Амбасадата на Грција во Скопје.