Русија и Кина заеднички се спротивставуваат на „дискриминаторските“ санкции во глобалната трговија што го попречуваат глобалниот социо-економски развој, изјави рускиот претседател Владимир Путин во писмено интервју за кинеската новинска агенција Синхуа.

Двете земји ќе продолжат да работат на намалување на трговските бариери меѓу нив, изјави Путин во саботата, пред четиридневната посета на најголемиот трговски партнер на Русија.

-Накратко, економската соработка, трговијата и индустриската соработка меѓу нашите земји напредуваат во голем број области. За време на мојата посета, сигурно ќе разговараме за понатамошни перспективи за меѓусебно корисна соработка и нови чекори за нејзино интензивирање во корист на народите на Русија и Кина – рече Путин.

Посетата на Кина, прва на Путин од минатиот мај, доаѓа во време кога тој се обидува да го сврти забавувањето на билатералната трговија, бидејќи војната на Русија во Украина продолжува да беснее, и покрај неодамнешниот самит со американскиот претседател Доналд Трамп во Алјаска.

Кога западните земји ги прекинаа врските со Русија по руската инвазија на Украина во февруари 2022 година, Кина дојде на помош, купувајќи руска нафта и продавајќи стоки од автомобили до електроника, зголемувајќи ја билатералната трговија на рекордни 245 милијарди долари во 2024 година.

Путин и Си Џинпинг прогласија стратешко партнерство „без ограничувања“ во 2022 година. Двајцата се сретнаа повеќе од 40 пати во последната деценија.