Рускиот претседател Владимир Путин во почетокот на следната недела ќе ја посети Монголија, земја која е членка на Меѓународниот кривичен суд (МКС) и затоа е обврзана да го уапси на нејзина територија врз основа на налогот за апсење издаден во март 2023 година поради обвиненијата за незаконска депортација на украински деца.

„Путин ќе допатува во официјална посета на Монголија на 3 септември“, се вели во соопштението на Кремљ во четвртокот, пренесува Антена обсерватор.

Путин оди во Монголија и покрај налогот за апсење

Ова ќе биде прво патување на рускиот претседател во држава членка на Римскиот статут откако МКС издаде налог за негово апсење во март 2023 година. Монголија го потпиша Римскиот статут во 2000 година и го ратификуваше во 2002 година. Така, секоја земја членка е должна да приведе секое лице на нејзината територија кое е предмет на налог за апсење на МКС, како што е случајот со Владимир Путин.

Кремљ секогаш одлучно ги отфрлаше обвинувањата на МКС против рускиот претседател. Сепак, Путин внимателно избегнуваше патувања во странство речиси една и пол година, прескокнувајќи го, на пример, самитот на БРИКС во Јужна Африка во август 2023 година, а потоа и самитот на Г20 во Индија во септември истата година.

Путин ќе биде уапсен во Монголија?

Од друга страна, тој ја посети Кина во мај, Северна Кореја во јуни и Азербејџан во средината на август, но ниту една од овие земји не е членка на МКС. Рускиот претседател оди во Монголија „на покана на монголскиот претседател Укна Курелсук“, според Кремљ, „да учествува во прославата на 85-годишнината од заедничката победа на советските и монголските вооружени сили над јапонските милитаристи“ во битката кај Халкин Гол.

Двајцата лидери закажаа средби и „ќе разговараат за изгледите за развој на руско-монголските односи“, соопшти Кремљ. Двајцата претседатели „ќе разменат мислења за актуелни меѓународни и регионални прашања“, додаваат од кабинетот на рускиот претседател, наведувајќи дека по тој повод ќе бидат потпишани „голем број билатерални документи“.

Последната посета на рускиот претседател на Монголија беше во септември 2019 година.

Монголија, земја богата со природни ресурси, се наоѓа во Источна Азија, меѓу Русија и Кина, без излез на море и има огромна територија. Сепак, има само 3,4 милиони жители. На почетокот на август, американскиот државен секретар Ентони Блинкен го посети монголскиот главен град Улан Батор за да покаже дека оваа држава  е „централен партнер“ на Вашингтон во регионот.

Посетата беше дел од иницијативата на Соединетите Држави да го зголемат своето влијание во оваа огромна земја, за која тврдат и ривалите на Вашингтон, Русија и Кина. Францускиот претседател Емануел Макрон, исто така, ја посети Монголија во мај 2023 година, додека Париз се обидува да ги зајакне билатералните енергетски врски со оваа држава.