Рускиот претседател Владимир Путин оствари телефонски разговори со францускиот претседател Емануел Макрон и германскиот канцелар Олаф Шолц, при што ги информирал дека „во блиска иднина има намера да потпише” указ за признавање на „Доњецката и Луганската народна република”, пренесува прес-службата на Кремљ, јави Ројтерс.

Донечка Народна Република и Луганска Народна Република не се признаени од ниту една членка на ОН.

Како што јави ТАСС, Путин ги информирал лидерите на Франција и Германија за резултатите од проширениот состанок на Советот за безбедност на Руската Федерација, на кој се разгледувала актуелната ситуација околу Донбас во контекст на одлуката на Државната дума за признавање на т.н. ДНР и ЛНР. Денеска, водачите на овие сепаратистички проруски региони во Украина побараа од Москва да бидат признат нивниот суверенитет.

„Имајќи го предвид сето ова, претседателот на Русија рече дека има намера во блиска иднина да потпише соодветен указ”, се вели во соопштението од Кремљ.

Шолц одржа итен разговор со блиските партнери, Макрон разочаран

Германскиот премиер Олаф Шолц одржува итни разговори со „најблиските партнери” откако Путин најави брзо признавање на независноста на сепаратистичките региони. Претходно, Шолц го предупреди Путин дека признавањето на проруските бунтовници би било „еднострано кршење на мировниот договор”, се вели во соопштението од кабинетот на Олаф Шолц.

И францускиот претседател Макрон изразил голема разочараност од одлуката на Путин и свика итен состанок на националниот Совет за безбедност.

По одлуката на Путин да ги признае сепаратистите, Обединетите нации предупредија дека „едностраните потези може да го поткопаат суверенитетот на Украина”.

Зеленски разговарал со Шолц и Макрон

Украинскиот претседател Володимир Зеленски на Твитер напиша: „Со оглед на изјавите дадени на состанокот на Советот за безбедност на Руската Федерација, одржав итни консултации со Емануел Макрон и Олаф Шолц и свикав седница на Советот за национална безбедност и одбрана”.

Given the statements made at the meeting of the Security Council of the Russian Federation, I held urgent consultations with @EmmanuelMacron and @OlafScholz and convened the National Security and Defense Council.

— Володимир Зеленський (@ZelenskyyUa) February 21, 2022

Претходно украинскиот министер за надворешни работи Дмитро Кулеба го повика Советот за безбедност на Обединетите нации „веднаш” да одржи седница за заканата што ја претставува Русија за Украина.

Кулеба на Твитер напиша дека најмоќното тело на ОН треба да се состане „за да разговараат за итни дејствија насочени кон деескалација, како и практични чекори за гарантирање на безбедноста на Украина”.