Рускиот претседател Владимир Путин и кинескиот претседател Си Џинпинг, двајцата на 72 години, разговараа за бесмртност и очекуван животен век од најмалку 150 години, не знаејќи дека разговорот е снимен од безбедносна камера пред почетокот на големата парада во Пекинг, објави денес Политико.

Двајцата лидери наводно разговарале за можноста за бесмртност преку трансплантација на органи и напредни медицински процедури.

„Порано, луѓето ретко живееја до 70 години, но денес на 70 години сè уште сте дете“, му рекол Си на Путин со помош на преведувач.

Путин одговорил дека човечките органи, со развојот на биотехнологијата, можат континуирано да се трансплантираат, а луѓето можат да се подмладат, „па дури и да постигнат бесмртност“.

„Предвидувањата се дека во овој век постои шанса да се живее 150 години“, додаде Си.

Кина има долга историја на земање органи од погубени затвореници, што официјално беше забрането во 2015 година, но тоа не ја ограничи практиката бидејќи владата се свртува кон малцинствата за органи, вклучувајќи ги и Ујгурите кои се соочуваат со геноцид во западниот дел од земјата, додаде Политико.

Минатата година, „Тајмс“ од Лондон објави дека претставници на Кремљ им наложиле на научниците да го забрзаат истражувањето против стареење, фокусирајќи се на клеточната дегенерација, когнитивниот пад и зајакнувањето на имунолошкиот систем.

Во Пекинг, Си беше домаќин на 26 светски лидери, вклучувајќи ги Путин и севернокорејскиот лидер Ким Џонг Ун, за голема воена парада по повод 80-годишнината од победата во Втората светска војна.