Рускиот претседател Владимир Путин денеска пристигна во Белорусија каде ќе се сретне со неговиот белоруски колега Александар Лукашенко.

Руската јавна телевизија го прикажа Путин како излегува од авионот и беше срдечно пречекан од Лукашенко. Рускиот лидер последен пат ја посети Белорусија во јуни 2019 година.

Разговорите ќе започнат во широк формат каде ќе учествуваат шефови на држави и членови на владите на двете земји. Претседателите потоа ќе ги продолжат разговорите во потесен формат во кој ќе учествуваат и министрите за одбрана, по што е закажана прес-конференција.

Агендата на разговорите вклучува цела низа билатерални односи, вклучувајќи трговска и економска соработка и спроведување на сојузничките програми.

Според Лукашенко, разговорот ќе биде фокусиран на воено-политичката ситуација во двете земји, прашања од воено-индустрискиот комплекс, безбедносните и одбранбените капацитети, а планирано е да се разговара и за гасот. Дополнително, ќе се разговара за актуелни меѓународни и регионални теми.

Кремљ ги отфрли шпекулациите дека целта на посетата на рускиот претседател Владимир Путин на Минск е да ја убеди Белорусија, која штотуку ја тестираше подготвеноста на своите воени сили, да се приклучи во конфликтот во Украина.

– Таквите предлози се „неосновани” и „глупави”, изјави денеска портпаролот на Кремљ, Дмитриј Песков.

Неделните воени вежби и проверки ги зголемија стравувањата во Украина дека Белорусија, откако и дозволи на Русија да изведува воени акции од нејзина територија, се подготвува за поактивна улога во конфликтот.

Во Киев денеска имаше серија руски напади со дронови кои ја оштетија „виталната” инфраструктура во екот на зимата, неколку часа пред доаѓањето на Путин на разговори со неговиот белоруски колега Александар Лукашенко.