„Политико“ тврди дека рускиот претседател Владимир Путин денес го разрешил рускиот министер за транспорт Роман Старовоит откако Украина му се закани на рускиот воздушен сообраќај.

Путин го назначи Андреј Никитин за вршител на должноста министер за транспорт, откако утрово издаде указ со кој го разреши поранешниот министер, Роман Старовоит.

Руската влада не даде официјално објаснување за смената на Старовоит, но промената дојде откако украинските напади со беспилотни летала за време на викендот предизвикаа хаос во рускиот воздушен сообраќај, при што патниците останаа заглавени на аеродромите поради откажани летови, наведува Политико.

Руските авиокомпании откажаа 485 летови, 88 летови мораа да бидат пренасочени, а 1.900 летови беа одложени помеѓу саботата и понеделникот, наведува руската Федерална агенција за воздушен транспорт и руското Министерство за транспорт.

Авиокомпаниите мораа да издадат 43.000 принудни поврати за билети, да обезбедат хотелско сместување за 94.000 луѓе, како и храна и пијалаци во вредност од 354.000 рубли (околу 3.800 евра).

„Комерсант“ објави дека проблемите со сообраќајот ќе чинат милијарди рубли (повеќе од 200.000 евра). Украинските беспилотни летала постојано ја принудуваа Русија да го затвори својот воздушен простор за цивилен сообраќај поради украинските напади. Старовоит раководеше со сообраќајниот оддел од мај 2024 година. Пред тоа, тој ја извршуваше функцијата гувернер на курската област.