Путин: Доколку мирно решение не е можно, Русија ќе ги исполни своите задачи со оружје
Рускиот претседател Владимир Путин изјави дека Москва, доколку конфликтот во Украина не може да се реши мирно, ќе ги исполни сите поставени задачи со употреба на оружје.
Препорачано
„Ми се чини дека има одредена светлина на крајот од тунелот. Ќе видиме како ќе се развива ситуацијата. Ако не, тогаш ќе мора да ги решиме сите задачи пред нас со сила на оружје“, нагласи Путин.
Тој додаде дека Русија ги гледа и ги цени напорите на сегашната администрација на американскиот претседател Доналд Трамп за наоѓање решение за конфликтот.
„Овој пат, Вашингтон не се ограничува на повици за мир, туку дава опиплив придонес за наоѓање решение“, рече рускиот лидер.
Путин потсети дека Киев во 2022 година изјави дека е подготвен да се бори „додека едната страна не ја сврти главата кон другата“. Ова, рече тој, се случило по повлекувањето на руските трупи од Киев, кога Москва предложи да се најде мирно решение преку преговори.
Трамп е оптимист
Американскиот претседател Доналд Трамп изјави дека е убеден во можноста за мирно решение во Украина и дека верува во потенцијална средба меѓу Путин и Зеленски.
„Разговарав со претседателот Путин и претседателот Зеленски. Нешто ќе се случи, иако тие сè уште не се подготвени. Но, ние ќе го направиме тоа“, рече Трамп, додавајќи дека внимателно ги следи чекорите на двајцата лидери во критичен момент од преговорите.
Тој изјави дека конфликтот во Украина е „најлесен за запирање“, но и „малку потежок од другите“, и дека неговиот пристап е да се најде решение преку директна средба на шефовите на држави, со посредство на САД.
Најава за ново ниво на преговори
По посетата на Кина на 3 септември, Путин ја објави својата подготвеност, доколку е потребно, да го подигне нивото на преговорите со Украина. Тој високо ја оцени работата на преговарачката група предводена од Владимир Медински, нагласувајќи го нивниот професионализам и воздржаност.
„Подготвени сме да се искачиме на навистина високо политичко ниво. Резултатот е важен“, рече Путин, истакнувајќи дека засега не сака да го прецизира составот на евентуалната нова делегација.
