Мостот на реката Вардар кај Башино село денеска повторно беше пуштен во употреба, откако во март годинава започнаа градежните работи за санација, како привремено решение до изградба на нов мост. Санацијата на мостот треба да го продолжи неговиот век на користење за 5-10 години.

– Денеска го пуштивме во употреба мостот кај Башино село, за возила и товарни и лесни патнички, така што безбедноста е на прифатливо ниво.Сакам да се заблагодарам на сите учесници во овој потфат почнувајќи од колегите од Универзитетот „Кирил и Методиј“ , Градежниот факултет, преку луѓето од Јавното претпријатие за државни патишта, директорот, општината Велес, потпретседателот на Влада и министер за транспорт, Министерството за внатрешни работи, изведувачите и сите останати коишто учествуваа во реализацијата на овој потфат, бидејќи беше прилично брз, ефикасен и успееавме да обезбедиме побрз транспорт во рамките на градот Велес, соопшти премиерот Мицкоски.

Од ЈП „Улици и патишта“ дека изведувачот на работите за санација на мостот е Друштво за градежништво и проектирање „Синтек инженеринг ДООЕЛ“, а вредноста на проектот е 24.614.554 или околу 400 илајади евра.

Монтирана е најсовремена опрема под самиот мост, која врши мониторинг 24 часа, и секое движење се евидентира.

Во периодот од 3 јануари до 3 март, до кога мостот беше затворен за сообраќај, целокупниот сообраќај се одвивал низ центарот на Велес, каде минуваа и тешки товарни возила, исклучиво ноќе.

Мостот беше итно затворен на 3 јануари, по барање на Државниот сообраќаен инспекторат, откако од Градежниот факултет стигнале резултатите од редовната контрола која се извршува двапати годишно на оштетени мостови кои покажале дека мостот е небезбеден.