Лидерот на каталонските сепаратисти Карлес Пуџдемонт се појави денеска пред група поддржувачи во Барселона и покрај налогот за негово апсење по бегството од Шпанија пред седум години, изјави извор на Ројтерс.

Партијата „Јунтс“ на поранешниот каталонски претседател Карлес Пучдемон вчера ги повика приврзаниците да се соберат денеска пред парламентот во Барселона за да го поддржат Пуџдемон, кој вчера потврди дека планира да се врати.

„Ќе го пречекаме Пуџдемон, кој се враќа од егзил“, соопштија од партијата на социјалните мрежи.

Членовите на „Јунтс“ тврдат дека нивната намера е да го придружуваат Пуџдемон до вратата на Парламентот, за да може да ги оствари своите политички права говорејќи пред политичарите како лидер на таа партија, пренесе агенцијата Ефе.

Пуџдемон не беше во Шпанија од 2017 година, кога шпанските власти наредија негово апсење поради организирање на нелегален референдум за независност на Каталонија.

Тој потоа ги избегна шпанските власти пребегнувајќи преку границата во самопрогласениот егзил во Белгија.