Холандија започнува двегодишен пробен период за администрирање на вакцината против птичјиот грип на живинарска фарма, објавија холандските медиуми. Министерката за земјоделство Фемке Вирсма, како и целиот живинарски сектор, има големи очекувања од вакцината, пишува „НЛ Тајмс“, пренесува Политика.рс.
-Никогаш не можете целосно да го елиминирате птичјиот грип.

Овој вирус главно се наоѓа кај дивите птици, но се шири низ целиот свет. Вакцинацијата на живината може да обезбеди епидемиите на птичји грип да бидат поретки во иднина – рече Вирсма, додавајќи дека ова е пилот проект и прв чекор кон масовна вакцинација. Овој експеримент дојде откако тестовите минатата година покажаа дека два вида вакцини се ефикасни во заштитата на птиците од вирусот. Двегодишна пробна вакцинација ќе биде спроведена на една живинарска фарма која произведува јајца само за холандскиот пазар. Вакцината ќе се дава на кокошки кои ќе пораснат во кокошки несилки, пренесува Танјуг.

Минатата година се разгледуваше можноста неколку живинарски фарми да учествуваат во овој проект, но холандската влада се одлучи само за една. Претставникот на организацијата „Авинед“, која собира различни трговски здруженија, Кес де Јонг рече дека развојот на вакцината траел толку долго токму поради грижата за безбедноста на храната. Во 2022 година птичјиот грип беше една од главните причини за нарушување на пазарот на живинско месо и јајца и поскапување, што во моментов се случува и во Европа, каде што е забележан енормен пораст на цените, а на кризата не ѝ се гледа крај. Повеќе од 50 милиони живина угинаа пред три години во Европа поради заканата од птичји грип и убивањето на дивите и домашните птици.