Основното јавно обвинителство Куманово соопшти дека нема докази за кривино дело па затоа се откажало од гонење на градоначалникот на општина Куманово, Максим Димитриевски. Со тоа, според обвинителството, случајот е затворен.

Како што се наведува во соопштението, првичното обвинение се темелело врз вештачење кое укажувало на значителна имотна штета од над 3.307.869 милиони денари, поради непостапување по член 59 став 11 од Законот за градење, а штетата, според тогашниот обвинителен предлог, им била нанесена на две правни лица.

„По изведување на сите докази во текот на постапката и пред се исказите на вештите лица произлегува дека тие се едногласни дека сега, во услови на веќе издадено Одобрение за градење, штетата наведена во обвинението нанесена на правните лица, поради непостапување по чл.59 ст.11 не постои, па оттука неспорно е дека повеќе не се исполнети законските обележја на кривичното дело кое со поднесеното обвинение се ставаше на товар. За да бидат исполнети законските обележја од наведената квалификација неопходно е да постои нанесена-настапена значителна штета, која во конкретниот случај во услови на издадено одобрение за градење не постои, согласно вештаците“ соопшти обвинителството.

Обвинителот испитувал и можност за постоење на друго кривично дело, но по двојна анализа на доказите – и на ниво на Основното обвинителство и на Јавното обвинителство на Република Северна Македонија – било утврдено дека нема доволно докази за покренување било каква кривична постапка по службена должност.

По повлекувањето на обвинението, Димитиревски во изјава за „Слободен печат“ рече дека поминал низ долго патешествие и дека кажал дека тоа е политички монтиран процес од страна на урбано – политичка бизнис спрега.

Димитриевски за повлекувањето на обвинението – Правдата победи, поминав низ долго патешествие во политички монтиран процес