Автомобилскиот гигант „Мерцедес-Бенц“ е првиот кој добил сертификат за целосно „вегански автомобил“, откако со новиот модел „ГЛЦ“ стана прв производител во светот кој има официјална потврда дека во него не се вградуваат материјали од животинско потекло.

Независната организација „Веган сосајети“ ги проверила сите површини во возилото, почнувајќи од седиштата и таванот, преку внатрешните облоги на столбовите и вратите, па до тепихот, пренесуваат медиумите.

Сертификатот ги осигурува клиентите дека сите површини, вклучувајќи ја вештачката кожа „Артико“ и платнените облоги, не содржат материи од животинско потекло. „Веган сосајети“ дополнително потврдува дека во сите постапки на производство и обработка не се користени состојки или помагала во преработена или непреработена форма, што се од животинско потекло.

„Мерцедес“ им го нуди пакетот „Веган“ на купувачите како опција во новиот „ГЛЦ“, кој прво стартува во електричната изведба, а потоа и со бензински, дизел и хибридни погонски единици. Тоа ќе биде означено во конфигураторот за „ГЛЦ“ со „веганскиот цвет“, што е препознатлив знак на „Веган сосајети“.