Свечено, достоинствено и со искрена возбуда на 23 јануари во салонот на Националната опера и балет се одржа првиот концерт на новооснованата Национална установа Национален џез-оркестар, со што се отвора нова страница во оркестарската музика кај нас.

Седумгодишниот ентузијазам, посветеност, страст за музицирање и желба да се исполни празнината во изведбата на дела за Биг-бенд оркестар успешно резултира со основањето на новата Национална установа Национален џез-оркестар. Џез-оркестарот беше регистриран пред крајот на минатата година, а произлезе од активностите на Здружението на џез музичари и слободни уметници.

Првиот концерт на Националниот џез-оркестар беше изведен на 23 јануари со наслов „Џез нова“ (Jazz Nova). Концертот донесе еден вид симбиоза на биг-бенд творештво на истакнати македонски џез-автори од повеќе генерации со изведба на десет композиции, а на бис беше изведена темата „Поздрав до оркестарот“ од доајенот на македонската музика Драган Ѓаконовски-Шпато.

– Заедно сме сведоци на испишувањето на еден нов дел во македонската џез историја. Со сета почит кон ревискиот оркестар и Биг-бендот на МРТВ, како претходници на она што го имаме ние денес, во овој период на нашата земја ѝ се случи нешто што досега го немало – Национален џез-оркестар – уште еден силен чинител на нашата културна сцена. Чест ни е што сме носители на првата генерација членови на џез-оркестарот и што заедно успеавме да издејствуваме нашето професионално делување да добие официјални рамки – истакна Гоце Стевковски, директор на установата.

Стевковски посочи дека од посебно значење беше одлуката за формирање на националната установа и поддршката од Владата и Министерството за култура, на чело со министерката Бисера Костадиновска-Стојчевска, кои го препознаа квалитетот на оркестарот и го иницираа процесот на негово институционализирање.

Пред почетокот на првиот концерт на Националниот џез-оркестар, министерката за култура Бисера Костадиновска-Стојчевска истакна дека со многу љубов, работа, разбирање, почит и визија заеднички стигнале до оваа концертна вечер на новоформираната национална установа од областа на културата.

– Знаеме како заедно дојдовме дотука. Затоа оваа вечер, задоволството е уште поголемо. Убедена сум дека овие музичари, кои му се познати и на регионот, ќе посегнат и кон врвот на светската џез-сцена. Како министерка за култура, како Министерство и како Влада, ќе ги поддржиме и на тој пат – рече Костадиновска-Стојчевска.

Одлуката за основање нова национална установа во културата – Национален џез-оркестар, Владата ја донесе минатата година. Новата установа ќе придонесе кон создавање висококвалитетен македонски џез-производ, којшто ќе постави нови критериуми и повисоки стандарди на македонската џез-сцена и ќе стане препознатлив во земјава и надвор од неа, по својата уникатност.

Оваа установа, меѓу другото ќе ги зачува талентираните џез-музичари, ќе им овозможи траен и одржлив ангажман, ќе се залага за едукација на млади таленти и ентузијасти, ќе организира џез-фестивали и настани коишто ќе помогнат во негувањето на џез-културата на територијата на целата држава.

За месеците кои следат, новата национална установа подготвува внимателно избран репертоар кој ги следи актуелните трендови во џез-музиката, но вклучува и изведби на џез-класици од домашната, регионалната и светската џез-сцена, како и гостувања на еминентни музички имиња.

(Текстот е објавен во „Културен печат“ број 215, во печатеното издание на весникот „Слободен печат“ на 27-28.01.2024)