Првични резултати од изборите во Хрватска: Милановиќ пред победа уште во првиот круг!?
Актуелниот претседател, според излезните анкети, освоил 51,5 отсто од гласовите, а неговиот најсериозен противкандидат, Драган Приморац, поддржан од владејачката партија ХДЗ, освоил 19,3 отсто
Претседателот Зоран Милановиќ е во убедливо водство на претседателските избори во Хрватска, покажуваат првичните проекции по затворањето на гласачките кутии во 19 часот.
Препорачано
Милановиќ, според излезните анкети, освоил 51,5 отсто од гласовите, а неговиот најсериозен противкандидат, Драган Приморац, поддржан од владејачката партија ХДЗ, освоил 19,3 отсто.
Речиси изедначени на третото место, со над 8 отсто од гласовите, се Марија Селак Распудиќ и Ивана Кекин, номинирана од движењето Можеме. Миро Буљ од партијата Мост освоил 3,5 отсто, професорката Бранка Лозо предложена од десничарската партија Домино освоила 2,6 отсто, независниот кандидати Томислав Јоњиќ освоил 4 0тсто, а Нико Токиќ Картело под 1 отсто од гласовите.
Одѕивот на гласачите бил под 40 отсто, послаб отколку на изборите пред пет години, но и повисок во споредба со претседателските избори пред десет години. Само во шест града бил надминат одѕивот од 40 отсто – во Вараждин, Чаковец, Крапина, Вировитица, Карловац и Пазин.
Ако конечните резултати покажат дека Милановиќ не освоил повеќе од 50 отсто од гласовите, вториот круг од изборите би се одржал на 12 јануари.
