Првата од петте меѓународни програми на проектот „Култарт ПРО“, со што започна втората едиција на овој меѓународен проект поддржан од програмата Еразмус+, се одржа од 7 до 11 април во Скопје.

Настанот го одбележува почетокот на соработка на шест организации од Бугарија, Австрија, Грција, Италија и Северна Македонија, со цел да ја обликува следната генерација културни менаџери преку организирање на пет меѓународни програми за стажирање и над 120 културни настани во земјите учеснички, со времетраење до јули 2025 година.

Првата програма, која се спроведе во Скопје, беше посветена на фотографијата и на работата на културната установа Македонски центар за фотографија. Покрај клучните експерти за оваа област проф. м-р Роберт Јанкулоски и м-р Моника Мотеска, свои предавања имаа и д-р Ана Франговска, м-р Игор Старделов и Лидија Пајевиќ.

Учесниците работеа на следните теми поврзани со фотографијата и културниот менаџмент: Трансформација на Македонски центар за фотографија во Музеј на фотографија; Употреба и злоупотреба на вештачката интелигенција во фотографијата; и Дигитализација на стари фотографии и фотографски материјали.

Студентите имаа можност да се запознаат со фотографската колекција на Македонскиот центар за фотографија, филмското депо на Кинотеката на Македонија, како и да ги посетат изложбите во Музејот на современата уметност и Националната галерија на Македонија.

Овој амбициозен проект, се рангираше на прво место меѓу повеќе од 70 кандидати за програмата Еразмус+, управувана од Центарот за развој на човечките ресурси од Пловдив, Бугарија.

Проектот „Култарт ПРО“ е обврзан да создаде професионално мрежно опкружување и да воспостави модерни образовни центри во Пловдив, Виена, Лече, Скопје и Јанина. „Култарт ПРО“ има за цел да го унапреди образованието за културно управување на младите на европско ниво, обезбедувајќи светла иднина за културниот и креативниот сектор.