Фудбалската репрезентација на Сенегал триумфира на Африканскиот куп на нации откако во финалето по подобро изведување на пенали со 4:2 го совлада Египет.

Одлучувачкиот гол со кој Сенегал за прв пат е шампион на Африка го постигна Садио Мане во петтата серија и се извади за промашениот пенал во седмата минута од натпреварот.
Ова беше трето финалето за Сенегал по тие во 2002 и 2019 година, но за прв пат излегува како победник од него, додека Египет остана на рекордни седум титули.

Натпреварот започна одлично за Сенегалците кои во третата минута добија пенал по прекршокот над Салиу Сис. По неколкуминутно надмудрување, одговорноста да го изведе пеналот ја презеде Садио Мане, но неговиот удар го одбрани Мохамед Абу Габал. Свој удел во одбранетиот пенал имаше и Мохамед Салах кој му шепна на голманот Абу Габал на која страна ќе шутира неговиот соиграч од Ливерпул.
Во продолжение од натпреварот, Сенегал имаше поголем посед на топката, повеќе напаѓаше, но немаше многу возбудувања пред голот на Египет, кој најдобрата шанса ја имаше во 43 минута преку Салах.
Фудбалерот на Ливерпул добро шутираше но неговиот удар го одбрани Едуард Менди.

Најголемата шанса во второто полувреме ја имаше Египет во 69 минута но Абделмонем слабо шутираше. До крајот на регуларниот дел, немаше големи возбудувања, додека продолженијата започнаа со шанса за Сенегал, но шутот на Бамба Диенг го одбрани голманот Абу Габал.

Во пенал серијата, прецизни за Сенегал беа Кулибачи, Диенг и Мане, додека ударот на Сар го одбрани Абу Габал. За Египет погодија Зизо и хамди, додека Абделмонем ја погоди стативата, а Менди во четвртата серија го одбрани шутот на Лашин и му ја донесе првата титула на Сенегал.
Сенегал и Египет идниот месец повторно ќе играат меѓу себе, овој пат во плеј-офот за пласман на Светското првенство во Катар.