Вечерва кошаркарите на МЗТ Скопје славеа нова победа во Првата македонска лига откако на гостински терен беа подобри од Академија ФМП со убедливи 86:102.

Шампионот го играше натпреварот во комбиниран состав, но на крајот сепак дојде до убедлива победа. Рамноправен противник домаќинот беше само во првиот период кој „аеродромци“ го добија со 25:26. Пред паузата фаворитот го подигна нивото на игра и со фуриозна завршница на пауза замина со 40:57.

Се што направи во второто полувреме Академија ФМП е да се врати до „минус девет“, повеќе од тоа МЗТ не дозволи. Како што одминуваше времето прашањето беше само со колкава разлика ќе слави МЗТ, во еден момент „штрковите“ имаа и 26 поени предност.

Димитар Пандев со 19 поени беше најефикасен на натпреварот, Дамјан Робев уфрли 18, додека кај ФМП Василевски беше најдобар со 15 постигнати поени.