Опаѓа интересот за упис на средношколци во популарните гимназии „Раде Јовчевски- Корчагин“, „Орце Николов“ и „Јосип Броз Тито“. Во Корчагин има 69 слободни места, во популарното ЈБТ фалат деца за околу два класа, а во Орце Николов останати се само 10 слободни места. За сметка на ова, Конкурсот за запишување ученици е завршен во гимназиите „Никола Карев“ и „Ѓорѓи Димитров“.

Според МОН, пополнет е бројот на деца во стручните училишта како економското „Васил Антевски Дрен“ и медицинското „Панче Караѓозов“. Место нема ниту во некои електротехнички училишта, а се повеќе интерес има за готвачи, келнери и фризери.

– Во првиот уписен рок вкупно се пријавија 16.007 ученици од кои 11.205 ученик за настава на македонски наставен јазик, 4.474 ученици за настава на албански наставен јазик, 322 ученици за настава на турски наставен јазик и 6 ученици за настава на српски наставен јазик. Во вториот рок се пријавија 3.371 ученици од кои. Во двата рока се запишаа 15.481 ученици- велат во МОН.

Според видот на образованието, во двете пријавувања запишани се вкупно 4.603 ученици во гимназиско образование, 10.277 ученици во стручно образование, 187 ученици во уметничко образование и 414 ученици во спортска гимназија.

Според официјалните податоци уписот во Скопје за гимназиско образование е завршен само во Гимназија „Никола Карев“ и СУГС Гимназија „Георги Димитров“.

Во останатите градови од државава слична е сотојбата како во Скопје. Најмалку заинтересирани имало за гимназија, а најмногу за стручните училишта како медицинсски техничари, градежни, хемиски техничари, но и електротехничари.

Учениците кои се упатени на поправни испити, испит на година, испити за побрзо напредување, може да се запишат во училиштата во кои има слободни места после јунскиот рок.

Според последните анализи на Државниот завод за статистика континуирано се намалува бројката на средношколци и ученици во основните училишта.

Така на почетокот на учебната 2022/2023 година, бројот на учениците во редовните основни училишта изнесува 185.099, што претставува намалување за 0.8 % во однос на претходната учебна година. Бројот на учениците во редовните средни училишта, на почетокот на учебната 2022/2023 година, изнесува 69 227, што претставува намалување за 2.5 % во однос на претходната учебна година.