Отпорот кај нашите сограѓани се јавува поради стравот од непознатото, поточно поради неукост, што не е европска вредност. Покажуваме сериозен недостиг на толеранција и прифаќање на различностите. Нетолеранцијата ни е пред сѐ, а таа се надминува само ако се обидеме да научиме како да живееме едни со други.

Ова е ставот на експертите по последниот случај на ксенофобија што се манифестираше во Куманово, Скопје и во Охридско кон групата од 40-ина луѓе, од кои половината се деца, наречена „Лев Тахор“. Иако имаат легален престој во земјава, тие беа непожелни на сите локации, а во селото Горно Лакочереј најавија и протести за да заминат.

– Актуелните случувања во нашето општество покажуваат дека имаме сериозни тешкотии со толеранцијата. Тоа е индикатор за сериозни културни и проблеми во социјализацијата и вредносната ориентација кај поединецот. Социолошко-психолошката димензија на моменти е застрашувачка, а може да биде поттикната и од дневната политика. Големо влијание има и медиумското известување – вели за „Слободен печат“ универзитетскиот професор Петар Митревски.

Јавноста се сеќава и на протестите во неготинското село Тимјаник. Жителите на Тимјаник, во летото 2018 година, бурно реагираа по одлуката на надлежните да сместат четири деца од специјалниот завод „Демир Капија“ во селото. Сега ексминистерката Мила Царовска се среќаваше со локалното население, по што конечно беше постигната согласност да се надминат недоразбирањата. Едукацијата придонесе да го сменат ставот – денес мештаните без резервираност и страв поминуваат време со овие деца. Некогашното негодување е преточено во соживот.

– Постојаното одбивање нешто ново, не е проблем што брзо се решава. Неопходен е воспитно-образовен амбиент, кој и на младите и на постарите граѓани ќе им овозможи да ја научат и да ја прифатат различноста како нормална состојба. Да се објасни дека во земјава живеат и други лица, со различни сфаќања, убедувања и потреби, и сите да бидат прифатени – нагласува во својот став за „Слободен печат“ социологот Ана Петкова-Поповска.

Таа даде пример за недоволна грижа едни за други, омаловажување и нечовечност – во скопско Визбегово жителите бараа дислокација на малиот групен дом поради недоволна грижа кон децата.

– Граѓаните тогаш обвинуваа дека воспитувачите немале контрола над штитениците на државата со нарушено поведение и дека од медиумите дознале дека во нивното соседство живеат деца што претходно биле згрижени во домот „Ранка Милановиќ“. Веднаш „решението“ беше протест. И во тетовско Волковија не дозволуваа на нивно подрачје да се гради Поправниот дом „Тетово“. А малолетниците стекнуваа вештини, вршеа земјоделски, значи образовен процес за деца – вели Петкова-Поповска.

ВИДЕО: Параноја и закани за „Лев Тахор“ на социјалните мрежи, полицијата ги бара заканувачите