Барањето на јужнокорејската опозиција за отповикување на претседателот Јун Сук-Јол, поради одлуката за воведување воена состојба, денеска беше одбиено во парламентот во Сеул поради немање кворум, пренесува „Јонхап“.

Сите, освен двајца пратеници на јужнокорејската владејачка Партија на народна моќ (ППП) го бојкотираа гласањето за предлогот за отповикување на претседателот. Гласањето го поддржаа сите пратеници од опозицијата.

Други пратеници од ППП ја напуштија седницата откако учествуваа во повторното гласање за нацрт-законот со кој се предлага истрага на специјалниот советник за наводите за корупција на првата дама Ким Кеон-Хје, што на крајот беше отфрлено.

Претседателот на Националното собрание, Во Вон Шик, ги повика пратениците од ППП да се вратат во парламентот и да гласаат за предлогот за импичмент, за кој е потребна поддршка од две третини од 300-те членови на парламентот за да биде усвоен.

Јун воведе воена состојба во вторникот за да ги искорени, како што рече, „антидржавните сили“, обвинувајќи ја опозицијата за парализирање на функциите на владата со барањата за отповикување на владата и предложените буџетски кратења. Тоа предизвика масовни протести во Сеул.

Пред денешното гласање, претседателот јавно се извини и вети дека ваква избрзана одлука нема да се повтори во иднина.