Еден од најдобрите македонски инструменталисти обоисти, м-р Васил Атанасов В’чев, кој во својата долга уметничко-педагошка кариера создавал многу генерации обоисти, сега објави и книга со наслов „Пиеси за обоа и пијано – Македонски фолклорни теми“. Промоцијата на книгата се одржа на 30 септември во „Матица ексклузив“.

– Идејата да ја напишам оваа книга долго тлееше во мене, и ете дојде време таа да се реализира. Во отсуство на доволна музичка литература за обоа од наши македонски автори ја создадов книгата со наслов „Пиеси за обоа и пијано – Македонски фолклорни теми“, бидејќи сметав дека е потребно и претставува насушна потреба за младите таленти што го изучуваат инструментот обоа и посетуваат настава во основно и средно музичко образование, а секако и за студентите што студираат музика. Книгата ја нарекувам и „Албум за деца и млади за обоа“, бидејќи во неа се опфатени познати македонски напеви од фолклорот кои се опејуваат низ годините и се негуваат во многувековната традиција на нашиот народ. Содржината на книгата е еден збир на моја обработка на повеќе познати фолклорни напеви, дополнети со нови мотиви, теми и варијации, подредени според својата тежина, со можност за изведба од најмладите таленти, средношколците, студентите и уметниците. Во книгата се застапени и три мои авторски композиции, со цел да ја внесеме традицијата од нашиот фолклор во класичната музика и изведба на концертниот подиум кај нас и пошироко – објаснува Васил Атанасов.

Меѓу промоторите и рецензенти на книгата се појавуваат д-р Анкица Витанова од Бирото за развој на образованието, професорот и инструменталист Драган Даутовски, како и музичкиот критичар и публицист Васка Наумова Томовска.

– Пионерскиот труд на м-р Васил Атанасов В’чев е ѕвезда водилка во сферата на образовната литература, прв и единствен до сега објавен „Албум на пиеси за обоа и пијано“, кој е силен пример за извонредно висок стручен критериум во она што на ова поле се нарекува темелна експонација на уникатната музичка и историска вредност на многувековните фолклорни напеви создадени од македонскиот народ. Токму тие вонвременски теми ќе се огласуваат низ прстите на младите обоисти низ повеќе генерации. Тоа е, без сомнение, чувство на гордост, исполнетост, но, пред сѐ, суштинско остварување на неговиот уметничко-педагошки сон – посочува музичкиот критичар и публицист Васка Наумова Томовска.

Музичкиот уметник обоист Васил Атанасов ѝ припаѓа на онаа одбрана плејада репродуктивни уметници во македонската култура, која својата силна уметничка дејност на концертната сцена, со моќниот говор на своите инструменти, со експресивна интерпретација, но најмногу со искрениот и со љубов предаден однос кон музичката уметност, ја гради денешната музичка култура и традиција кај нас.

Неговата истрајност на патот на уметноста, на патот кон креативната интерпретација, се граничи со строг фанатизам на еден силен и енергичен дух на карактерен човек и длабоко вљубен уметник во звукот на својот инструмент, кој за него живот значи – обоата.

(Текстот е објавен во „Културен печат“ број 99, во печатеното издание на весникот „Слободен печат“ на 2-3 октомври 2021)