Познатиот кардиолог Доктор Сашко Кедев се искачи на врвот Г2 (Гашербрум 2), во Пакистан, висок 8.035 метри, објави Федерацијата на планинарски спортови на Македонија (ФПСМ).

„За првпат во историјата македонско знаме на G2 (Gasherbrum II), Пакистан, 8.035 м. На 22 јули 2024 година, во 13:28 часот по локално време, проф. д-р Сашко Кедев го искачи тринаесеттиот по височина врв на светот“, соопшти Федерацијата.

Ова е 11-от врв на Хималаите од вкупно 14 што се високи над 8.000 метри кој влегува во „портфолиото“ на д-р Кедев.

„Честитки за искачувањето на единасеттиот од вкупно четиринаесет врвови над 8000 мнв. Да се множат осумилјадарките“, е честитката на ФПСМ, објавена на Фејсбук.

Покрај Г2, д-р Кедев досега се искачи на Макалу (8.485 м) тој ги има искачено и Монт Еверест (8.848), Нанга Парбат (8.126), Анапурна (8.091), Чо Оју (8.188), Броуд Пик или Широк Врв (8.051), К2 (8.611), Даулагири (8.167), Манаслу (8.163) и Лоце (8.516).

За да се комплетира „мисијата“ 14 врвови, преостануваат уште Гашербрум 1 (8.068),  Канченџунга (8.586) и Сишапангма (8.027).