Во последната седмица од месец февруари во Домот на култура „Кочо Рацин“ во Скопје, по вторпат се одржа фестивалот за култура „Коронијалс“, чија цел е да го разбуди духот на уметничкото Скопје во еден чувствителен период на пандемија. Влезот беше бесплатен, а настанот се одвиваше по пропишаните ковид-мерки.

На настанот продефилираа групни и самостојни ликовни изложби, како оние на матурантите од ДСУЛУД „Лазар Личеноски“ од Скопје, како и самостојната изложба „Бегство од рефлексија“ на Михаил Митевски. Љубителите на класичната музика ја проследија „Ноќта на класична музика и опера“ во реализација на учениците од ДМБУЦ „Илија Николовски – Луј“ и студентите од ФМУ.

Писателот Стефан Марковски говореше за неговото творештво и за придонесот кон списанието „Современост“. Режисерката Ана Андонова имаше проекција насловена „Малечка“, а младата уметница Емануела Ковачевска-Китановска настапи со својата нова монодрама „Ѕвездан“. На денот на отворањето на изложбата, програмата ја збогати ученикот Никола Јовановиќ со својата монодрама „Кабаре“.

Атмосферата на фестивалот, за кој организаторите велат дека „го чува и го подава она што ѝ недостасува на културата денес“, ни ја долови поетесата и актерка Емануела Ковачевска-Китановска. Родена е во 2002 година во Скопје, а освен што пишува поезија, учествува и на поетски читања во Скопје, но и самата организирала многу поетски средби, и добитничка е на бројни награди.

– Во ова пандемиско време не можеме да ја видиме полната светлина на уметноста што младите ја творат. Дури подоцна ќе се одрази нејзиното влијание. Но, затоа младоста во Скопје покажува една надеж, еволуција и поинаков пристап кон новите промени. Храброста, амбициозноста и гласот што сите го имаме зема полет и буди нови вредности во културата на нашиот град – ни изјави Ковачевска-Китановска.

Разнородната седумдневна програма вбројуваше групни и самостојни ликовни изложби, ноќ на класична музика и опера, емисии, поткасти, игранки, театар и филм, и креативни работилници.

– Програмата беше спектар на скоро сите уметности, како ликовната, визуелната, музичката, театарската, книжевната и др. Најголема посетеност имаше на вечерите посветени на операта и класичната музика, на театарот и на поетското читање. Се одрази еден глад кон културни случувања и дружења, со тоа што секој млад човек очекува да слушне нешто ново и да се запознае со себе – вели оваа млада уметница.

За крај, ја прашавме и дали по овие две ипол години пандемија, на која се надеваме ѝ се гледа крајот, се чувствува нов креативен импулс кај младите.

– Непредвидливоста секогаш ќе има впечатлива динамика во креативноста на едно детство и на една младост. Нема простор за да ја прифатиме сегашната бизарност, туку да влијаеме на неа и да се обидеме да ја промениме. Чувствувам дека се будат револуционерни импулси во срцето на градот и дека токму тие ќе бидат столб и прашање на новите времиња – заклучи Ковачевска-Китановска.