Купишта ѓубре, шут, стари гуми, душеци, па дури и остатоци од заклани животни секојдневно се натрупуваат околу контејнерите во близина на зградите кај автобуската станица на последна 45-ка во населбата Ченто, се жалат жителите од зградите.

Во четирите контејнери поставени за потребите на станарите од овие згради, како што објаснуваат граѓаните, завршува целиот отпад од соседните села. И ова е така постојано. Летово, кога температурите се високи, низ целата околина се шири неподнослива смрдеа, а целото тоа ѓубре е и потенцијален извор на зарази.

Жителите тврдат дека комуналците секојдневно ги празнат контејнерите и го чистат целото ѓубре околу нив, но џабе, уште истиот ден повторно се создава депонија.

Навистина имаме голем проблем што може да се реши само со казни, со инспекции, но очигледно нема кој да казнува. Ужасно е. Си доаѓаат од околните села со автомобили, со пикапи, од гепекот вадат ќеси со ѓубре, ги полнат контејнерите, а ако нема место, ги оставаат покрај нив. Што сѐ не завршува тука, стари тоалетни школки, душеци, црева од животни, градежен шут. Па потоа маалските кучиња и мачки ги растураат ќесите и го разнесуваат отпадот. Цел тревник е во ѓубре. Што е право, комуналците чистат, дури и тоа што не им е работа го собираат и следниот ден пак исто – раскажува еден од жителите.

За собирање на комуналниот отпад од селата на потегот од Ченто до Раштак, задолжено е ЈП „Комунална хигиена“. Оттаму велат дека отпадот редовно се собира, но признаваат дека навистина има проблем кај овие контејнери, за кои тие немаат надлежност да го решат.

Контејнерите во населба Ченто се празнат редовно седумпати неделно според годишна оперативна програма. Исто така, пластичните канти од домаќинствата во руралниот дел на општината се празнат еднаш неделно, во согласност со оперативната програма за работа. Непрописно одложениот отпад до контејнерите редовно се чисти од страна на ЈП „Комунална хигиена“, но надлежноста за спречување непрописно одложен отпад е на Општина Гази Баба. Контејнерите и самата локација каде што се поставени особено во летниот период, се мијат со автоцистерна за да се задржи нивото на хигиена – објаснуваат од претпријатието.

Секој жител на Македонија лани создал 503 килограми отпад

Во однос на тоа дали поставените контејнери кај автобуската постојка ги задоволуваат потребите, од „Комунална хигиена“ велат дека проблемот со отпадот на оваа локација не е поради бројот на контејнери.

 Бројот на контејнерите е приспособен според потребите на станбените згради во околината. Проблемот настанува поради одлагање отпад од жители што доаѓаат од други делови на општината – тврдат од јавното претпријатие.

Од Општина Гази Баба два дена нема одговор на прашањето дали Општината ќе преземе нешто да го реши проблемот со кој се соочуваат жителите, а кој трае подолго време.

Оваа општина има и свое комунално претпријатие кое е формирано уште пред 17 години за да врши комунални дејности во руралните подрачја, поточно во селата Брњарци, Булачани, Раштак, Инџиково, Јурумлери, Сингелиќ, Смилковци, Страчинци, Стајковци, Црешево, Трубарево, Виниче, Идризово, Нова Колонија и Гоце Делчев. Но, во пописот на неговите услуги не спаѓа собирање на комуналниот отпад.

Оттаму велат дека надлежни за собирање на отпадот се ЈП „Комунална хигиена“, кои треба да го собираат отпадот од индивидуалните домаќинства еднаш неделно за што жителите плаќаат и соодветен надоместок.

ЈКП Гази Баба 2007 нема надлежност за собирање комунален домашен отпад во ниту едно населено место на територијата на Општина Гази Баба, бидејќи целата територија на Општина Гази Баба во овој дел ја покрива ЈП „Комунална хигиена“ на Град Скопје. Ние како јавно претпријатие се грижиме за јавната чистота и во повеќе наврати се имаме обратено до ЈП „Комунална хигиена“ каде што им е понудена соработка и помош во доменот на нашите можности и законски надлежности – одговараат од претпријатието.

Градот засмрде од ѓубре: Градоначалниците бараат комуналците и Арсовска да си ја вршат работата

Проблемот со отпадот, кој во контејнерите поставени за потребите на станарите од зградите им доаѓа од комшиските села, очигледно наскоро нема да се реши.

На потег е Општина Гази Баба и нејзините инспектори, кои треба да го казнат ваквото однесување на жителите на селата. Тоа можат да го сторат секојдневно доколку излезат на терен и, како што велат граѓаните од Ченто, барем малку се „проврткаат“ во близина на контејнерите. Доколку се казни барем еден од оние што ѓубрето недозволено го исфрла околу контејнерите, можеби тоа ќе влијае врз однесувањето и на сите други што ова го практикуваат.