Освен 80 илјади дози вакцини против грип кои се бесплатни за одредени категории граѓани, во центрите за јавно здравје пристигнаа и 2.400 комерцијални вакцини наменети за граѓаните кои не спаѓаат во ризичните категории а сепак во сезоната на инфлуенца сакаат да се заштитат. Од нив во Центарот за јавно здравје Скопје има илјада вакцини а цената за една вакцина е 700 денари.

Министерството за здравство вчера соопшти дека почнува пријавувањето за бесплатна вакцинација против сезонски грип на ризичните групи население, кои може да се пријават со пополнување на апликацијата на следниот линк или преку својот матичен лекар. За нив вакцината против грип е бесплатна. Станува збор за четиривалентна вакцина од производителот „Абот“ од Холандија.

Со бесплатната вакцинација се опфатени ризичните категории население: повозрасни лица над 65 години, лица со хронични заболувања, здравствени работници, бремени жени, деца на возраст од шест месеци до пет години, како и лицата сместени во установи за социјална заштита на стари лица и вработените во овие установи.