Принцот Вилијам и Кејт Мидлтон наводно присуствувале на раскошна и прилично „луда“ забава по повод 50-тиот роденден на Џејмс Метјуз, сопругот на Пипа Мидлтон. Прославата се одржала минатата сабота на нивниот имот во мирната селска област Беркшир во Англија, пренесува „Њујорк пост“.

Големата прослава започнала попладне и траела до раните утрински часови. Темата на забавата била „провокативна“, очигледна алузија на поранешната кариера на Метјуз како професионален возач на трки. Денес, Џејмс, наследник на шкотската феудална титула Лорд Глен Африка, е успешен бизнисмен и извршен директор на инвестициската фирма што ја основал, Еден Рок Капитал Менаџмент.

Метјуз, чие богатство се проценува на милијарди, се ожени со Пипа Мидлтон , помладата сестра на принцезата од Велс, во мај 2017 година, и заедно сега имаат три деца.

Покрај принцот и принцезата од Велс, на списокот на гости биле и голем број познати гости. Меѓу нив биле пензионираниот тркачки возач и извршен директор на Ред Бул, Кристијан Хорнер, со неговата сопруга, поранешната членка на „Спајс грлс“, Џери Халивел, и братот на Метјуз, ѕвездата од ријалити шоуто Спенсер Метјуз, со неговата сопруга, водителката Вог Вилијамс.

Иако прославата била раскошна и гламурозна, таа предизвика и незадоволство кај селаните. Според британските медиуми, забавата започнала со спектакуларен прелет на борбен авион „Супермарин Спитфаер“ над нивниот имот од 145 хектари. Моќниот звук на моторот наводно ги исплашил кучињата во соседството, а гласната музика што одекнувала до 1:30 часот наутро дополнително ги налутила селаните.

Соседите ги критикуваа домаќините и нивните гости за нивниот недостаток на внимание. „Станува збор за пристојност и почит. Има луѓе со многу пари, но ова беше со посебна привилегија. Сакам забави и самиот сум ноќна птица, но исто така сум свесен за другите луѓе“, рече еден локален жител. Други истакнаа дека домаќините лесно можеле да организираат таканаречена тивка дискотека, за да не го нарушат мирот во селото.