Докторите во прилепската болница згрешиле кога ги испишале близначињата од прилепското село Славеј, кои подоцна починаа премрзнати – без да го информираат Центарот за социјални работи. Ова е заклучокот на Државниот здравствен и санитарен инспекторат кој ќе бара дисциплинска одговорност кај здравствените работници што ги лекувале и испишале близначињата.

Инспекторатот констатирал дека кога на 10 јануари мајката со потпис, на свое барање заминала од болницата со новороденчињата предвреме родени на 30 декември и со мала тежина, болницата не го известила Центарот за социјални работи.Од страна на докторите било инсистирано мајката да остане во болницата се додека бебињата да имаат целосно адаптирање, но во извештајот се вели дека таа инсистирала на испис.

Во наодот на Инспекторатот се вели дека ќе биде издадена и наредба за задолжително известување на надлежен Центар за социјални работи во случај кога интересите на пациентот односно неговиот родител или старател се спротивставени, а за што од страна на ДСЗИ ќе биде спроведена и соодветна прекршочна постапка. Министерот за здравство формира комисија за стручен надзор над работата на болницата.

Бебињата беа испишани од болница на 10 јануари, со тежина под 2 килограми. Двете починаа 6 дена подоцна.