Американските власти прикриваат информации за остатоци од вонземни возила и нивни пилоти и оружја што може да го пеплосаат човештвото, сведочеа прексиноќа пред Конгресот тројца разузнавачки и воени ветерани што извршувале високи функции во Пентагон.

Целта на сослушувањето на тројцата поранешни офицери не беше да се отворат нови теории на заговор, урбани митови или сценарија за фантастични филмови, туку напротив, да се открие дали владата прикрива информации и да се поттикне пријавување на што повеќе случаи на необјаснети аномалиски феномени (НАФ) – нов израз за популаризираните неидентификувани летечки објекти (НЛО).

– Неразјаснетите аномалиски феномени, што и да се, може да претставуваат сериозна закана за нашите воени и цивилни авиони. Мора да го разбереме тоа. Мора да охрабриме уште повеќе пријавувања, не да прикриваме. Колку повеќе ќе разбереме, толку ќе бидеме побезбедни – изјави Роберт Гарсија, демократски конгресмен од Калифорнија.

Американските конгресмени вчера макар за кратко ги надминаа партиските поделби при внимателното сослушување и распрашувањето на тројца „свиркачи“ пред Поткомитетот за национална безбедност, гранични и надворешни прашања.

– Ова е прашање на транспарентноста на владата. Не зборуваме за мали зелени или за летечки чинии, туку ќе се држиме до фактите. Треба да откриеме дали има прикривање и се надевам дека ова е само почетокот на низа сослушувања – објасни републиканскиот конгресмен Тим Баркет од Тенеси.

Феномените се чувствителна тема од строго доверлив карактер, зашто првите претпоставки секогаш се дека неидентификуваните летала се испратени од друга, потенцијално непријателска земја. Таков карактер, на пример, имаше и балонот што неодамна ја прелета Америка и се покажа дека бил кинески.

– Ако неидентификуваните аномалиски феномени се странски беспилотни летала, тие претставуваат итен проблем за националната безбедност. Ако се нешто друго, тогаш се прашање за научниците. Во секој случај, неидентификуваните објекти се загрозување на безбедноста на летовите – објаснува „свиркачот“ Рајан Грејвс, поранешен морнарички пилот, кој сега е на челото на група што ги поттикнува пилотите да пријавуваат појави што не можат да ги објаснат.

Пентагон неодамна веќе направи големи чекори кон поголема транспарентност на документите за НЛО, споделувајќи со јавноста доверливи документи. Шон Кркпатрик, директор на надлежната канцеларија во Пентагон, во април изјави дека САД следат 650 потенцијални случаи на НАФ, но истакна дека „нема никакви докази за вонземен живот или за технологии за кои не важат законите на физиката“.

Некои од феномените од документите достапни до јавноста се научно објаснети, а другите, но повеќето не се, поради што имаше голем интерес за сослушувањето на поранешните офицери пред Комитетот на Конгресот.

Јавноста со особено внимание го очекуваше исказот на Дејвид Груск, поранешен разузнавачки офицер, кој уште во јуни тврдеше дека САД посетуваат „целосно и делумно исправни вонземни возила“ и „останки од пилот, кој не бил човек“. Груск се прочу низ светот кога за „Њузнејшн“ изјави дека американските власти имаат „многу големо вселенско летало, големо колку фудбалски терен“, а за францускиот весник „Паризиен“ дека САД „го поседуваат леталото во форма на ѕвоно, кое владата на Бенито Мусолини го пронашла во Италија во 1933 година“.

На барањето од конгресмените да го повтори исказите, тој сепак, одговори дека „лично не ги видел ни возилата ни пилотот“ и дека „тоа го слушнал од колеги“ и го дознал од „разговори со повеќе од 40 лица“.

– Американските власти спроведуваат повеќедецениска програма за собирање и копирање на урнати вонземни летала – изјави Груск, кој до оваа година ги водеше анализите во Пентагон за необјаснети аномалиски феномени.

Груск се жали дека и од оваа позиција не му бил дозволен пристап до строго доверливата владина програма за НЛО, а кога се пожалил се соочил со „многу брутален одговор“. Поранешниот офицер тврди дека „знае за луѓе што биле повредени при владините настојувања да ги прикрие тајните информации“.

На сведоштвото на Груск веднаш возврати Пентагон: „Истражителите не откриле какви било информации што може да бидат верификувани за тврдењата дека постоеле или постојат какви било програми за поседување и копирање на вонземни материјали“.

Дејвид Фравор, поранешен морнарички офицер, изјави дека видел чуден објект на небото додека бил на мисија за обука во 2004 година.

– Технологијата со која се соочивме беше далеку посупериорна од сѐ што сме имале – одговори Фравор на прашањето зошто феномените се закана за националната безбедност на САД.

Пензионираниот пилот Грејвс сведочеше дека „секој ден неколку години по ред забележувал необјаснети феномени над Атлантикот.

– Тоа не беа ни ретки ни изолирани случаи. Сведоци беа и екипажи на воени и на комерцијални авиони, чии животи зависат од точноста на идентификувањето на околината – изјави Грејвс.

Тој додаде дека најчестите сведоштва се однесуваат на „темносиви или црни коцки чии темиња допираат проѕирна сфера“.

Републиканскиот конгресмен Глен Гротман во завршниот збор ги оцени сослушувањата како „просветлувачки“ и изрази надеж дека со соодветен закон ќе биде обезбедена поголема транспарентност.