Блискиот пријател и поранешен шеф на Михаел Шумахер, Флавио Бриаторе, сподели емотивни вести за состојбата на легендата на Формула 1. Шумахер претрпе сериозна повреда на мозокот по несреќа на скијање во декември 2013 година, а неговата сопруга Корина и по 12 години ги чува деталите за неговиот третман далеку од очите на јавноста пишува „Мирор“.

Многу малку луѓе имале можност да го посетат, но познато е дека повеќе од 11 години по несреќата, тој сè уште бара постојана грижа.

Бриаторе, кој го донесе Шумахер во Бенетон и му помогна да освои две светски титули, е еден од ретките што го посетиле по несреќата.

Запрашан за моменталната состојба на Шумахер, Бриаторе за италијанскиот весник „Кориере дела Сера“ изјави:

„Кога ги затворам очите, го гледам како се смее по победата. Претпочитам да го паметам така отколку да го гледам како лежи во кревет. Често разговарам со Корина“.

По несреќата, Шумахер помина 250 дена во медицински предизвикана кома пред да му биде дозволено да се врати дома и да го продолжи лекувањето. Иако информациите се оскудни, Корина сподели некои детали во документарецот на Нетфликс од 2021 година „Шумахер“.

„Ми недостига Михаел секој ден. Но, не сум единствената што го сака. Децата, семејството, неговиот татко, на сите околу него им недостига. Сите го сакаат Михаел, но тој е тука. Различен, но тој е тука, а тоа ни дава сила. Ние сме заедно. Живееме заедно дома. Одиме на терапија. Правиме сè што можеме за Михаел да се чувствува подобро и удобно. И само да го почувствуваме нашето семејство, нашата поврзаност. Многу ми е важно тој сè уште да може да ужива во својот приватен живот колку што е можно повеќе. Тој секогаш нè штитеше, а сега ние го штитиме него“, рече таа во тоа време.

Жан Тод, кој беше шеф на тимот на Ферари кога Шумахер освои пет последователни светски титули, исто така ја посети легендата на Ф1 по несреќата.

„Михаел е тука, па не ми недостига“, изјави Тод за „Л’Екип“ во 2023 година.

„Но, тој едноставно не е оној Михаел што беше порано. Тој е различен и за него прекрасно се грижат неговата сопруга и децата кои го штитат. Неговиот живот сега е различен и имам привилегија да споделувам моменти со него. Тоа е сè што може да се каже. За жал, судбината го погоди пред 10 години. Тој повеќе не е оној Михаел што го знаевме во Формула 1.“