Пријателството започнато во подоцнежните години се претвори во неверојатна животна авантура за 84-годишните Еленор Хемби и Сандра Хејзелип.

Бестрашните Еленор и Сандра ги обиколија сите седум континенти за само 80 дена, а нивната приказна за љубопитноста, отпорноста и животот со полн капацитет стана глобална инспирација, пишува „Пипл“.

Пријателство родено од трагедии

Еленор и Сандра се познаваат повеќе од две децении, но нивната врска станала нераскинлива дури откако и двете доживеале тешки лични загуби. Запознавајќи се на работилница за медицински мисии во Далас, тие споделувале страст кон хуманитарната работа. Пет години откако починал сопругот на Сандра, сопругот на Еленор ненадејно загинал во несреќа на тенис. Еден месец подоцна, Сандра ѝ се јавила на Еленор со необична понуда.

Ѝ требало сместување две ноќи неделно во Абилин, Тексас, каде што отворала геријатриска клиника.

„Ми рече: ‘Ми треба кревет две ноќи неделно. Ако ми дадеш кревет, ќе те носам на вечера’“, се присетува Еленор. „Знаете што? Тоа беше пред 20 години, и таа сè уште доаѓа овде неколку ноќи неделно, и така почна пријателството“.

@aroundtheworldat80 #BestFriends #OVER70 Sandy & Ellie dreamed of seeing the world together. They wanted to #travel #aroundtheworld in 80 days at 80 years old! #bffgoals @Penguin Books ♬ Breakaway – Kelly Clarkson

Иако имале сосема различни личности – Сандра е топла и нежна, а Еленор храбар авантурист – наскоро сфатиле дека на светот гледаат на ист начин. „Тогаш почнавме да сфаќаме, леле, некако гледаме на светот низ исти очила“, вели Хемби.

Буџет за ноќевања од 29 долари

Нивната заедничка филозофија дека радоста може да се најде насекаде, дури и со ограничен буџет, станала основа на нивните патувања. Првата голема заедничка авантура била возењето со Транссибирската железница во 2008 година, и тоа во втора класа. Принципот никогаш да не патуваат во прва класа и да се држат до буџет од само 29 долари по ноќевање станал нивен заштитен знак.

„Ако патувате во прва класа, знаете ли со кого разговарате? Со други туристи“, нагласува Хемби. „Но, ако патувате во втора класа и престојувате во мали, семејни пансиони… знаете ли кого запознавате? Сите локални жители таму“, рекле тие.

До 2020 година, по низа заеднички патувања, Сандра изнела храбра идеја: зошто да не го обиколат светот за 80 дена за нивниот 80. роденден? Инспирирани од Филиас Фог на Жил Верн, тие го испланирале секој детаљ, но пандемијата на ковид сè запрела. Тие не се предале. Во јануари 2023 година, со ново мото „околу светот за 80 дена на 81-годишна возраст и сè уште во движење“, конечно тргнале на пат.

Од Антарктикот до пирамидите во Каиро

Нивното патување започнало на Антарктикот, а потоа „цик-цак“ го обиколувале светот. Во Каиро пронашле најевтино сместување за само 13 долари по ноќ. Искуството било незаборавно – скромна, семејна куќа без хотелски натпис, но со чиста соба и поглед од покривот на пирамидите.

„Феноменално. Можевме да го гледаме светлечкото шоу за 13 долари“, опишала Хемби.

Нивните приказни одекнале низ светот, а тие неочекувано станале вирални ѕвезди познати како „баби-патници“.

Вирална слава и нова книга

Иако нивните стилови на патување се различни, бидејќи Еленор сака да нурка со ајкули, а Сандра претпочита добра книга, нивното пријателство ги збогатило.

„Ели е бестрашна“, вели Хејзелип, додавајќи дека пријателката ја турнала надвор од зоната на комфор. И покрај тоа што заедно имаат четири вештачки колена, патувањата поминале без здравствени проблеми.

Иако повеќе не планираат да ја повторат вртоглавата авантура од 80 дена, решиле да продолжат да го истражуваат светот со побавно темпо. Своите искуства ќе ги споделат во претстојната книга „Одиме: Лекции за бестрашно живеење од две патувачки баби“ (Here We Go: Lessons for Living Fearlessly from Two Traveling Nanas), која излегува на 16 септември.

„Мислевме дека одиме околу светот за да се забавуваме за себе, но ова беше шлаг на тортата за нас“, рекла Хејзелип за поддршката што ја добиле од луѓето ширум светот.

„Таму надвор има голем, прекрасен свет кој ве чека, а луѓето со кои ќе се сретнете исто така чекаат да им го отворите срцето“, порачала Хемби.

@aroundtheworldat80 Sandy & Ellie have become the Traveling Nanas. Two women who became best friends late in life – after the loss of their husbands. They traveled around the world in 80 days at 81 together. #booktok #bookgirls #olderwomen #bookreccomendations #bestfriendsforever @Penguin Books ♬ Unwritten – Natasha Bedingfield