Претседателот на Туркменистан го отпушти главниот обвинител на земјата затоа што не ги исполнил правилно неговите должности, објави тамошните медиуми.

Претседателот Сердар Бердимухамедов го објави отказот за време на состанокот на Државниот совет за безбедност, на кој беше разгледана работата на воените структури и структурите за спроведување на законот во централноазиската земја.

Бердимухамедов објави дека го отпушта генералниот обвинител Сердар Мјаликгулиев поради „неправилно исполнување на неговите должности и ниско ниво на организација на работата на обвинителството“, според владиниот дневен весник Неутрален Туркменистан. Тој не образложи повеќе.

Мјаликгулиев беше назначен во јули 2022 година. Тој ја надгледуваше истрагата за нелегални зделки со жито и коруптивна шема за продажба на авионски билети, меѓу другите случаи од висок профил, пренесува АП.

Бегмурат Мухамедов, кој претходно беше министер за правда, а потоа беше избран во парламентот и стана шеф на парламентарната комисија за надворешни работи, го наследи Мјаликгулиев, објави весникот.

Бердимухамедов (42) беше избран во март 2022 година да го наследи својот татко Гурбангули, кој ја водеше земјата богата со гас од 2006 година.

Туркменистан остана главно изолиран под автократски владетели откако стана независен по распадот на Советскиот Сојуз во 1991 година.