Претседателот на Салвадор, Наиб Букеле, вчера објави дека го забранува „инклузивниот јазик“ во јавните училишта во земјата, како дел од новите строги дисциплински правила за образовните институции, објави Ла дереча диарио.

Сојузникот на Доналд Трамп, Букеле, усвои конзервативна политика, иако пред да дојде на власт рече дека ги поддржува барањата на ЛГБТК+ заедницата.

As of today, the so-called “inclusive language” is prohibited in all public educational centers in our country. https://t.co/4JXb9ez3yC

— Nayib Bukele (@nayibbukele) October 3, 2025

Забраната има за цел да промовира „добра употреба“ на јазикот и „да се избегне мешање на идеологии или глобализација што би можеле да му наштетат на развојот на учениците“, оправда министерката за образование Карла Тригерос.

Забраната важи и за сите услуги на Министерството за образование, како што се книгите и содржините.

Учениците во јавните училишта веќе мора да почитуваат строги правила за нивната облека и фризура, што синдикатот на наставници „Френте Магистеријал Салвадорењо“ го опиша како „милитаризација“ на училишниот систем.

Минатата година, Букеле отпушти 300 вработени во Министерството за култура поради одбрана на прашања што се некомпатибилни со визијата на неговата влада за „традиционалното семејство“, „верата“ и „животот“, според пратениците од владејачката партија.

Претседателот на Салвадор, кој е на власт од 2019 година, е популарен по својата борба против бандите. Но, групите за човекови права ги осудуваат злоупотребите на правата и велат дека илјадници невини луѓе се во затвор.