Армискиот полигон Криволак како безбедносен адут за земјава може да донесе и економска добивка, но за тоа му недостасува малку меѓународен маркетинг. Одржувањето на мултинационалната вежба на НАТО „Брз одговор 2025“ во земјава е само еден таков сегмент кој придонесува за поголема видливост на овој наш воен капацитет. Секако, заедно со отпочнатиот процес на модернизација на Армијата, кој според мене се движи во правилна насока, со мали недостатоци и напори кои треба да ги направиме преку вложување повеќе во човечкиот капитал, Македонската армија во моментов е високо почитувана земја членка на НАТО Алијансата. Ова меѓу другото го истакна полковникот во пензија и поранешен портпарол на Генералштабот на АРМ, Тони Јаневски во емисијата „Пресврт“ .

-Криволак одамна е препознаен од нашите сојузници, особено од САД, како исклучително вреден стратешки ресурс – вистински скапоцен камен. Иако за некои изгледа како полупустински терен, токму таа разновидност му овозможува да биде погоден за различни типови воени операции. Тука се изведуваа вежби од висок профил, како „Swift Response“, со 700 падобрански скока, користење на хеликоптери „апачи“ и активности поврзани со атомско-биолошко-хемиска одбрана. Тоа покажува дека Криволак ги исполнува стандардите на НАТО. Потенцијалот е огромен – вели Јаневски.

Тој во исто време посочува дека државниот врв мора да прави повеќе кога станува збор за меѓународната видливост на нашиот воен капацитет Криволак, кој според Јаневски може на државата да ѝ донесе и економски придобивки.

-Да, недостасува маркетинг – но не политички, туку стратешки и промотивен. Имаме политичка согласност и континуитет во користењето на Криволак како долгорочна инвестиција, што веќе ја враќа довербата кај нашите сојузници – посочува Јаневски.

Јаневски во емисијата зборуваше и за процесот на модернизација на Армијата, што според него се и недостатоците на АРСМ во овој момент, како тече постапката со нашите сојузници, за претстојниот самит на НАТО во Хаг и како Македонија би можела да одговори на барањата на Алијансата за  5 % од БДП на земјава да одат за одбраната.

Целиот разговор со полковникот Тони Јаневски можете да го погледнете во видеото погоре во емисијата „Пресврт“ со новинарот Дејан Србиновски.